Agjencia Telegrafike Shqiptare (ATSH) ka marrë zyrtarisht të mërkurën Presidencën e AMAN, organizata e Agjencive të Lajmeve të vendeve të Detit Mesdhe.
Kalimi i Presidencës nga Agjencia Egjiptiane MENA tek ATSH u bë gjatë ditës së dytë të Asamblesë së 25-të Agjencive të Lajmeve të të vendeve të Detit Mesdhe, që po zhvillohet në Tiranë.
Kalimi i Presidencës u bë përmes një shtrëngimi duarsh mes ish-Presidentit të AMAN, Drejtorit të MENA-s, Tarek Abdel Ghaffar dhe Drejtorit të Agjencisë Telegrafike Shqiptare, Gëzim Podgorica..
Drejtori i MENA-s, Tarek Abdel Ghaffar uroj ATSH-n për mandatin dhe theksoi se Agjencia e tij do të vijojë me mbështjetjen maksimale ndaj AMAN-it si dhe do të ndihmojë ATSH-n në Presidencën e saj.
“Më lini t’ju rikujtoi se jam shumë i lumtur që jam në Shqipëri, një vend që do të thotë shumë për Egjiptin. Më lini në radhë të parë të uroj ATSH-në për mandatin e Presidencës së AMAN-it, pasi është një angazhim mjaft i rëndësishëm, që Agjencia jonë është përpjekur ta mbyllë me sukses”, tha Tarek Abdel Gaffar.
“MENA nuk do të kursehet në kontributin e saj në drejtim të AMAN. Përmes eksperiencës sonë do mbështesim ATSH-në në drejtimin e saj dhe jam i sigurtë se do të jenë të suksesshëm në Presidencën e saj”, tha Tarek Avdel Ghaffar.
Ai më tej bëri një përmbledhje të 12-muajve të Presidencës të Agjencisë Egjiptiane të Lajmeve.
Drejtori i Agjencisë Telegrafike Shqiptare, Gëzim Podgorica garantoi angazhim maksimal, ndërsa kërkoi institucionalizim të mëtejshëm të marrëdhënieve mes Agjencive të Mesdheut. “Ne shkëmbejmë shpesh informacione mes nesh. Rrugët e komunikimi janë të larmishme, por ka ardhur momenti të institucionalizojmë edhe më shumë këto marrëdhënie, duke intensifikuar edhe më tej bashkëpunim ndër institucional. Unë e di që Shqipëria është një vend i vogël dhe ka pak informacion, por ne do përpiqemi të jemi sa më të shpejtë e të saktë në lajmet tona lidhur me interesin e përbashkët dhe uroj që këto lajme të pasqyrohen në mediat tuaja”, tha Podgorica.
Pas kalimit të Presidencës nga Agjencia MENA tek ATSH, Sekretari i Përgjithshëm i AMAN, George Penintaex shpalli dhe fituesit (tre vendet e para) e shkrimit dhe fotos më të mirë.
Për shkrimin më të mirë, çmimi iu dha Agjencisë Marokene e Lajmeve me Adil Zaari Jabiri, ndërsa për foton më të mirë u shpall fituese, Ozge Elif Kizil i Anadolli Agency (AA), të Turqisë.
Gjatë punimeve të ditës së dytë të Asamblesë të Agjencive të Lajmeve të Mesdheut u diskutua dhe për takimet e ardhshme, duke u nisur nga eksperiencat e shkëlqyera në të kaluarën.