Aktivistë të Aleancës Kuq e Zi kanë protestuar sot paradite në Qytetin Studenti, kundër aferave korruptive të drejtorit të këtij qyteti. Ata kanë kërkuar që prokuroria të nisë hetimet për abuzimet e drejtorit Bujar Brovina, i cili sipas tyre ka përfituar miliona dollarë në rrugë antiligjore dhe i ka ndarë me njerëz të afërt të kryeministrit Sali Berisha.
“Ne jemi sot këtu për të kërkuar nga Prokuroria e Përgjithshme hetimin dhe arrestimin e drejtorit të Qytetit Studenti, i cili është përfshirë në aferën korruptive të 3 milionë dollarëve, si dhe për cilësinë e dobët të jetesës së studentëve shqiptarë në Qytetin Studenti. Aleanca Kuq e Zi deklaron se të gjitha denoncimet që ajo kryen për aferat korruptive të pushtetarëve të Sali Berishës nëse Prokuroria e Përgjithshme nuk vepron, pas 23 qershorit, qeverisja kuqezi do të ndëshkojë pa dallim të gjithë ata zyrtarë që kanë përlyer duart në paratë e korrupsionit dhe mbi kurrizin e qytetarëve shqiptarë dhe studentëve”, deklaruan aktivistët e AK.
Policia i ka shpërndarë me forcë aktivistët e AK, të cilët ishin duke marshuar drejt zyrës së Brovinës në Drejtorinë e Qytetit Studenti.
Në tetor të vitit të kaluar, Kontrolli i Lartë i Shtetit, në një raport për Qytetin Studenti, konstatoi parregullsi dhe keqpërdorime të fondeve, që shkojnë afërsisht në 3 milionë dollarë. KLSH çoi për ndjekje penale Kryetaren e Këshillit Mbikëqyrës të shoqërisë dhe dy anëtarë të tij, por jo drejtorin Bujar Brovina, që ka urdhëruar veprimet.