Lideri i Fronit Al Nusra, Abu Mohammad al Julani, pohoi dje se tani për tani nuk ka ndërmend që të fillojë sulme kundër perëndimit, por nuk përjashtoi mundësinë për ta bërë këtë në të ardhmen nëse perëndimi vazhdon të mbështesë regjimin e Bashar al Asadit. “Kemi urdhër që të mos sulmojmë Perëndimin dhe Europën për momentin, por kjo mund të ndryshojë nëse vazhdojnë të mbështesin regjimin e Bashar al Assad”, tha Al Julan, grupi i të cilit është degë e Al Kaedas në Siri, në një intervistë për kanalin televiziv Al Yazira. Ai akuzoi Shtetet e Bashkuara dhe vendet perëndimore për mbështetje ndaj qeverisë së Damaskut. “Prova është se ata sulmojnë Frontin Al Nusra sa herë që ne i bëjmë presion Al Asadit”, tha ai.
Drejtuesi xhihadist shtoi se objektivat e liderit të Al Kaedas, Ayman al Zawahiri në Siri, janë të rrëzojnë regjimin dhe aleatët e tij, si për shembull grupin shiit libanez Hezbullah dhe të punojë me të gjithë botën për një Shtet Islamik të drejtë”. Më herët ai shprehu se qëllimi është të shndërrojë territorin sirian në një bazë për t’u përhapur në vendet e tjera, por për momentin vetëm Al Assad dhe Hezbulla janë shënjestra e tij.
Nga ana tjetër Al Julani mohoi se “ekziston një grup që quhet Korasan”, duke iu referuara një celule veteranësh të Al Kaedas të integruar në Frontin Al Nusra dhe që ka qenë objektiv i bombardimeve të koalicioni ndërkombëtar, të udhëhequr nga Shtetet e Bashkuara. Al Julani theksoi se i vetmi që flet për Korasanin është Uashingtoni dhe që sipas tij ka qenë sajuesi dhe mbrojtësi i regjimeve jo besnike duke iu referuar qeverive të tjera arabe.
Megjithatë ai pranoi se ka disa afganë dhe të huaj në radhët e Frontit Al Nusra. “Nuk ekziston fare Korasan, vetëm civilë. Çdo gjë është e ekspozuar, asnjë grup nuk është i fshehur”, tha ai.
Përsa i përket financimit të organizatës së tij, Al Julani shtoi se pranojnë donacione nga myslimanë të tjerë jashtë Sirisë, “por jo nga shtetet”.
Megjithatë ai vuri theksin se ata nuk duan të përhapen. “Përqendrohemi vetëm tek agresorët”, tha drejtuesi i Al Kaedas, i cili detajoi se për këtë motiv nuk sheh nevojën që të luftojë kundër ndjekësve të besimeve të tjera si të krishterët, apo drusët, në rast se ata nuk i sulmojnë.
Pavarësisht triumfeve të muajve të fundit, Al Julani parashikoi se në të ardhmen do të ketë etapa shumë më të vështira. Intervista që zgjati rreth 20 minuta u regjistrua në vendin arab dhe Al Julani shfaqet në të i maskuar. /DITA