Një person është plagosur me armë zjarri pasditen e sotme në Vlorë. I lënduari, një 41-vjeçar, mësohet se plagosurnë gjoks dhe po mjekohet në spitalin Rajonal. Gjendja e tij shëndetësore paraqitet e rëndë, bënë me dije burime spitalore.
Ngjarja
Sipas një rindërtimi paraprak të ngjarjes nga policia lokale, 41-vjeçari ndodhej në një makinë top “Audi” me targë “AA 633 VC” kur në drejtim të tij është qëlluar me armë zjarri. Ngjarja ka ndodhur në lagjen “Pavarësia” rreth orës 17:40. Më pas, i lënduari është transportuar në spitalin rajonal për të marrë mjekim.
Policia është njoftuar për ngjarjen dhe ka shkuar në vendngjarje duke kryer edhe veprimet e para hetimore. Në afërsi të stacionit të trenit, Policia ka gjetur duke u djegur një automjet, i cili dyshohet të jetë përdorur nga autorët për fshehjen dhe largimin e tyre.
Burime zyrtare thanë se “shërbimet e policisë po krehin zonën për të bërë të mundur kapjen e autorëve, ndërsa grupi hetimor ndodhet në vendngjarje ku vijon puna për zbardhjen e rrethanave të ngjarjes, si dhe identifikimin e autorëve”.
v.l/ Dita