Një ditë pas atentatit të tipit mafioz në Elbasan, ku u plagosën dy persona, policia nuk ka asnjë të dyshuar. Në përpjekje për të zbardhur ngjarjen policia iu ka shtrirë dorën qytetarëve. Kush jep informacion për autorin do të marrë një shpërblim prej 20 mijë euro.
Nëpërmjet një deklarate, policia thekson se informatorët do të mbeten anonim.
“Drejtoria Vendore e Policisë Elbasan, vë në dispozicion shumën prej 20.000 Euro për çdo informacion të vlefshëm që çon në zbardhjen e ngjarjes dhe identifikimin e autorit Sigurojmë anonimatin për çdo shtetas që do japë informacion të saktë në numrat e cel 0694110853 dhe 0694100003 dhe në numrin pa pagesë 129”, thuhet në njoftim.
Në videon e publikuar nga policia është një person me kapele, çka e vështirëson identifikimin e tij. Videoja e publikuar tregon momentin kur autori i krimit largohet nga vendngjarja.
Mëngjesin e ditës së djeshme, rreth orës 10:00, në një nga zonat më të populluara të Elbasanit, në rrugën “28 Nëntori” një person i armatosur hapi zjarr me breshëri automatiku ndaj një makinë ku ishin Florenc Capja dhe Bledar Muça. Plumbat plagosën lehtë Bledar Muçën dhe një efektive policie që ishte duke kaluar aty rastësisht.
Ndërkohë policia e Elbasanit ka siguruar portretin e njeriut të ulur në një nga lokalet ku ndodhi ngjarja. Autori ishte i veshur me rroba kamuflazhi, me kapele. Sapo makina tip “Ford”kaloi në rrugën “28 Nëntori”, ai ngrihet nga kafja dhe qëlloi me breshëri kallashnikovi.
Makina u godit në pjesën e parme, por xhami ishte i blinduar. 20 metra larg vendit të ngjarjes, policia gjeti armën e atentatorit, i cili arriti të fshihej përmes rrugicave.