Shefi kundër Trafiqeve dhe Narkotikëve në komisariatin e Sarandës Orges Mezini dhe shefi i krimeve Orges Thomai si dhe 6 efektivë të policisë i kanë shpëtuar fatmirësisht plumbave të një shumëkërkuari gjatë operacionit për arrestimin e këtij të fundit.
Taulant Gjini, person i shumëkërkuar për tentativë vrasjeje por edhe për trafik droge ka qëlluar mbi policinë në tentativën për t’i shpëtuar arrestimit mbrëmjen e djeshme në fshatin Shëndëlli të Sarandës.
Sipas informacioneve në operacion kanë qenë dy makina policie, ndërkohë që Drejtoria e Përgjithshme e Policisë së Shtetit bën të ditur se në drejtim të forcave të policisë është qëlluar nga 3 drejtime të ndryshme. Në makinën e qëlluar lëviznin 4 efektivë të policisë të përfshirë në operacion.
“Në kuadër të hetimeve të kryera, dyshohet që ky shtetas në sulmin ndaj forcave të policisë ka bashkëpunuar dhe me disa persona të tjerë, për të cilët vijon puna për identifikimin e tyre” thuhet në njoftimin e policisë.