“Mëhillajt doja t’i vrisja se ndihesha i përdorur, policia gënjen për vrasjet në Greqi”

Julian Sinanaj, i penduari i drejtësisë si vrasës me pagesë i grupit të tritolit, dëshmon para prokurorëve se kishte pasur pakënaqësi ndaj “kontraktorëve të vdekjes”, kushërinjve Genis dhe Andon (Erjon) Mëhillaj dhe po mendohej t’i likuidonte dhe ata në shenjë hakmarrje. Kjo dëshmi e re i ka kapur të papërgatitur anëtarët e grupit hetimor, që kanë mësuar për përplasjet e hershme mes ndërmjetësve dhe ekzekutorit. Një pakënaqësi të tillë Sinanaj e ka shprehur edhe ndaj ndihmësit të tij N. Gj., i cili i frikësuar e denoncoi në polici para se të ekzekutohej biznesmeni i gazit Piro Bare, me porosi të biznesmenit të arrestuar Ilir Karçini. Por Sinanaj ka mohuar që të kishte dijeni për lidhjet politike, duke thënë se kontaktet e mësipërme dhe njohjet i kishin vetë kushërinjtë Mëhillaj dhe ai nuk dinte gjë. Po kështu ka mohuar autorësinë e atentateve ndaj Skerdilajd Konomit, Fredo Berberit, Xhemal Çelës dhe prokurorit Dorian Tafili, ndërsa ka akuzuar policinë se ka keqpërdorur emrin e tij për atentatet e Greqisë, për të cilat tha se nuk është autor.

Përplasja me Mëhillajt

“Dyshova tek kushërinjtë Mëhillaj që në porosinë e parë kur më thanë të vrisja Sokol Veizin. Më premtuan 1500 metra tokë afër bregdetit në Orikum dhe në fund më dhanë vetëm një apartament. Më tej vendosa t’i vrisja, por u rregulluam më pas. Kur mora porosinë e vrasjes së Agron Çelës, nisa të kisha dyshime të tjera se ma punonin pas krahëve dhe po më përdornin. Nuk i qëndronin asnjëherë fjalës”, ka thënë Sinanaj për grupin hetimor detaje të reja për grupin e tritolit. Ai pranon se Genis dhe Andon Mëhillaj fillimisht porositën për vete ekzekutimet, por më pas sillnin porosi nga të tjerët. “Pas vrasjes së Agron Çelës vendosa që të hiqja qafe edhe ata, pasi më kishin mërzitur. Më dukej sikur po më përdornin dhe ma punonin pas krahëve”, ka përsëritur Sinanaj. Por megjithëkëtë, ai ka marrë edhe dy atentate të tjera përsipër me ndërmjetësim të Mëhillajve, mes të cilëve edhe ai i biznesmenit Piro Bare.

Lidhjet politike

Prokurorët kanë kërkuar të shkonin më tej me fijet e organizatës, se kush i tërhiqte ato. Por këtu Julian Sinanaj është treguar i prerë. “Unë nuk dija asgjë për lidhjet e politikës. I merrja thjesht si porosi me pagesë dhe bëja punën. Nuk interesohesha asnjëherë së kush qëndronte pas. Sigurisht që kushërinjtë Mëhillaj kishin njohjet dhe lidhjet e tyre të politikës, që nuk m’i thoshin mua”, ka thënë i penduari. Grupi hetimor dyshon se mes Sinanaj dhe porositësit, qëndrojnë lidhje të tjera që po hetohen, dhe Mëhillajt janë kyçi.

Mohon disa atentate

Interesi më i madh i prokurorëve janë atentatet e bujshme të pazbardhura, të kryera me të njëjtën metodë, që duken nga e njëjta dorë. Por Sinanaj ka mohuar kategorikisht. Është pyetur për autorësinë e vrasjes së gjyqtarit Skerdilajd Konomi dhe biznesmenit Xhemal Çela, plagosjen e kryekomunarit Fredo Berberi dhe hedhjen në erë të makinës së prokurorit të Vlorës, Dorian Tafili. Por të gjitha i ka mohuar, duke thënë se nuk kishte dorë. “Nuk kam bërë asnjë nga këto krime që më thoni, megjithëse duken e njëjta dorë. Unë kam kryer dy vrasjet me pistoletë dhe armët i fsheva. Kam vendosur eksplozivin te Kollozi, përgatita bombën për Dervishin”, ka thënë Sinanaj. Ai ka treguar dhe ku fshehu armët e krimit. Për momentin i janë gjetur 10 milionë lekë të mbledhura nga puna e kryer dhe kërkohen të tjerat në llogaritë bankare. “Nuk kam kryer asnjë vrasje në Greqi. Kam dëgjuar deklaratën e policisë, por unë nuk jam autor”, ka vijuar i penduari. Dyshohet se Sinanaj mund të jetë stërvitur në Greqi gjatë qëndrimit atje me familjen, para se të vinte në Shqipëri.

Genis dhe Andon Mëhillaj nuk kanë kaluar në pikat kufitare

Kushërinjtë Genis dhe Andon Mëhillaj janë ndër personat më të kërkuar për momentin nga policia. Fotografitë e tyre janë shpërndarë në të gjitha pikat kufitare dhe u ofruan 10 mijë euro shpërblim për personin që do jepte informacion për vendndodhjen e tyre. Sipas sistemit TIMS nuk rezulton se Andon dhe Genis Mehillaj kanë dalë nga vendi në mënyrë të ligjshme me dokumente në doganë. Por nuk përjashtohet të jenë larguar me mënyra të tjera, në këmbë matanë kufirit, ose me gomone drejt Italisë. Po kështu edhe udhëtimi me dokumente të falsifikuara. Si pjesë e grupit mësohet se janë edhe dy persona të tjerë në kërkim, emrat e të cilëve nuk u publikuan dhe po hetohen policët spiunë që rrodhën informacionet gjatë hetimit. Nëna e Sokol Veizit, tregon se kushërinjtë Mëhillaj ishin dukur në Orikum te tokat që pretendojnë dhe për të cilat vranë djalin e saj, dy javë para se të kapej Sinanaj. Nazo Veizi thotë se ishin në konflikt për 800 metra tokë.

********

Policia: Vonesa me N.Gj.-në? Ishte thjesht një kurth

Nga opozita prej ditësh është hedhur ideja se policia shpërfilli denoncimin e N. Gj., 30 vjeç, nga Vlora, që endej prej 13 ditësh nga një qytet në tjetrin sepse nuk i pranohej ky denoncim. Por  sipas Policisë ky ishte kurthi për të peshkuar vrasësin Julian Sinanaj. Një zyrtar i lartë i Policisë së Shtetit, i shpjegoi gazetës “Dita”, se “praktikat operacionale të policisë interpretohen nga politika ashtu siç dhe i intereson”.

Më tej tregon me detaje disa pika të nxehta të aksionit: “Vetëm me denoncimin e N. Gj., ky hetim do të ishte shumë i vështirë dhe do të minohej, pse kishte shumë boshllëqe. Ai dinte fare pak gjëra, sepse autori i vërtetë i krimeve ishte pikërisht Julian Sinanaj. Dhe vetëm duke siguruar këtë dyshe, ne mund të bënim zbërthimin e grupit”, tregon oficeri. Ai mohon që N. Gj,. të kishte më shumë se 10 ditë sorollatje nëpër komisariate dhe se nëndrejtori i Përgjithshëm i Policisë së Shtetit ia mohoi denoncimin.

“Nuk është e vërtetë se nuk i është marrë denoncimi. Janë disa provokime të njohura në praktikën policore dhe operacionale. Ju siguroj se N. Gj., ka qenë nën vëzhgim që në momentin e parë kur ofroi denoncim dhe bashkëpunim. Nëse ne do të lëviznim hapur dhe bujshëm që në atë moment, mund të na kishin ikur të gjithë. Ndaj e lamë që ai të lëvizte i lirë, madje edhe të kujtonte sikur nuk ishte i mbrojtur, ndërsa nga pas kemi vënë agjentë të shumtë që ndiqnin në imtësi çdo gjë për të parandaluar sulmin ndaj tij”, shpjegon oficeri.

Duke menduar se po afronte dita dhe ora e vrasjes së biznesmenit, është vepruar duke përdorur shkëmbimin e mesazheve mes tyre. Dhe në mesazhin e fundit të shkëmbyer, agjentët kanë vepruar, duke e lokalizuar Julian Sinanajn afër “21 Dhjetorit” në shoqërinë e një vajze i ulur në lokal. “Komunikimi mes tyre na mundësonte një provë të fortë”, – thotë oficeri.

Në fakt, pas arrestimit Sinanaj mohoi që të ishte vrasës me pagesë, megjithëse iu gjetën foto të viktimave dhe biznesmenit që do vriste. Por kur është ballafaquar me N. Gj. është dorëzuar dhe pranoi të bashkëpunonte si i penduar.