Berisha: Dy vjet më parë, njerëz të hurit e të litarit u përpoqën të rrëzonin qeverinë me dhunë

Ashtu si çdo të hënë, kryeministri Berisha ka zhvilluar mbledhjen e grupit parlamentar të APrtisë Demokratike. Duke folur para deputetëve demokratë, Berisha tha se 21 janari është datë e rëndësishme për kombin shqiptar, pasi shënon mbajtjen e Kongresit të Lushnjës, por edhe ndarjen nga jeta të ish-presidentit kosovar, Ibrahim Rugova.

“Sot është një ditë e madhe në historinë e kombit, kongresi i Lushnjës, e cila ndryshoi historinë Shqipërinë. Ka qenë një histori e vërtetë e mrekullueshme e historisë shqiptare, pasi konsolidoi nisjen e ndërtimit të kombit shqiptar. Por sot është një ditë po ashtu e rëndësishme, pasi në vitin 2006 u nda nga jeta një nga personalitetet më të rëndësishëm pas Skënderbeut, Ibrahim Rugova. Ai ishte një Gandi jo vetëm i shqiptarëve, por edhe Ballkanit dhe Europës, që me forcën e ideve u bë arkitekt i pavarësisë së Kosovës. Një çështje për të cilën pothuajse nuk flitej”, tha Berisha.

Më tej, ai ka komentuar edhe 21 janarin e 2011-s, duke i cilësuar protestuesit si një grup aventurierësh që u përpoqën të rrëzonin qeverinë me dhunë. Berisha akuzoi kreun e PS-së se po bën presion ndaj drejtësisë.

“Në 21 janar dy vjet më parë, një grusht aventurierësh bënë përpjekje me dhunë që të rrëzojnë qeverinë e dalë me votë. Duke shprehur edhe njëherë ngushëllimet për familjet e viktimave të Edi Ramës, i kërkoj të ndërpresë çdo formë presioni ndaj drejtësisë. Ndërkohë, garantoj qytetarët se e vërteta do të dalë dhe drejtësia do të veprojë. Deri më sot, asnjë prej atyre që organizoi, pagoi dhe mashtroi njerëz të hurit dhe të litarit që erdhën për të përmbytur pushtetin me dhunë dhe krijoi viktima para ndërtesës së qeverisë, vetëm pse zoti Rama donte të mbante fjalim nga ballkoni i zyrës sime dhe tani përpiqet të mbledhë vota me kortezhe mortore, për të cilat ai ka përgjegjësi maksimale“, tha Berisha.