Bibliotekës Kombëtare po i zvogëlohen çdo ditë hapësirat. Gazeta “Panorama” shkruan sot se ky institucion tashmë gjendet i “pushtuar” nga librat dhe në mungesë ambientesh. Në analizën vjetore për vitin 2012, të zhvilluar pak ditë më parë në BK, gjatë raportimit të çdo sektori, u ripërsërit shqetësimi i mungesës së hapësirave për mbajtjen e librave. Në lidhje me këtë problem, drejtori i bibliotekës më të pasur në vend, Aurel Plasari, thotë se shpreson që ky vit të sjellë një zgjidhje. “Tashmë është një problem i njohur dhe mediat kanë dhënë ndihmesën e tyre në sensibilizimin e opinionit administrativ. Hapësira po bëhet gjithnjë e më shqetësuese për Bibliotekën Kombëtare, por edhe për shërbimin publik. Shpresojmë që ky vit të na ofrojë një zgjidhje të pjesshme për ta lehtësuar këtë problematikë”, tha Plasari gjatë analizës vjetore të Bibliotekës Kombëtare, në të cilën ishte i pranishëm edhe ministri i Kulturës, Aldo Bumçi.
Ministri u shpreh se shpreson që gjatë këtij viti të krijohen hapësirat e nevojshme fizike për Bibliotekës Kombëtare.