Brokaj: Adriani hapi rrugën që bllokoi Zani, e di dhe Frrok Çupi

Petrit Brokaj është një emër i njohur në qytetin e Vlorës.  Shkak për këtë intervistë u bë deklarata e deputetit demokrat Edi Paloka ditët e fundit, ku ai akuzonte qeverinë se po emëron pjesëtarët e bandës së Zani Çaushit në polici. Duke qenë se e njeh mirë Adrian Liçajn, Brokaj tregon se cila është vërteta e sulmit kundër tij…

– Zoti Brokaj, ditët e fundit PD ku me anë të një fillmimi të vitit 1997, akuzonte qeverinë se po rekruton në polici anëtarët e bandës së Zani Çaushit. Ju e njihni Vlorën dhe vlonjatët. Si është e vërteta?

Po e dëgjova deklaratën e Palokës dhe u çudita dhe më erdhi neveri me atë shpifje. Duke e ndjerë në kurrizin tim e të vëllazërisë sime këtë luftë të ndyrë e antinjerëzore, doja të shpreh indinjatën time për këtë dukuri kaq të përdorur nga politika e sotme. Shkak u bë shpifja e fundit e deputetit të Partisë Demokratike, Edi Paloka me komentin e një fragmenti filmik të vitit 1997.
Pra ju e quani shpifje këtë akuzë të Palokës?

Po, fund e krye shpifje. Kemi 23 vjet që po dëgjojmë lloj-lloj shpifjesh. Pas një shpifje del një tjetër e kështu shpifja zë shpifjen, derisa nga shpifja diçka të mbetet. Në qoftë se nuk e do një njeri dhe do që t’i bësh keq, shpif, sa më shumë shpif, se do të gjenden disa njerëz që do të të besojnë . Por edhe nëqoftëse nuk do të të besojnë, shpifja jote do t’i shërbejë atij që të ushtrojë ligësinë, të derdhë urrejte me sulme armiqësore politike, të ndërsejë për keq opinionin, dhe më tutje… që cmirëzinjtë të zgërdhihen dhe hipokritët të justifikojnë mosmirënjohjen.

Pse iu kthye Paloka dhe PD vitit ’97, pikërisht këto ditë?

Duke qënë se PD këto ditë u diskreditua nga shpifjet ndaj qeverisë socialiste për luftën kundër kriminalitetit, unë mendoj se i duhej një shkak tjetër që të vazhdonte mbjelljen e armiqësisë e hakmarrjes mes njerëzve. Për të dalë nga ky hall, u hodh në vitin më vetëdiskretitues, por edhe më të paharruar për popullin tonë, në vitin 1997, duke sajuar një fakt, që për idiotllëkun e tyre morën prej tij vetëm një segment.

Le të flasim më konkretisht: A e njihni Adrian Liçaj dhe si ka qenë qëndrimi i tij në vitin 1997?

Kur thashë më lart që viti 1997 është për popullin vit i paharruar, kam parasysh, se ai nuk harron asnjë çast e asnjë ngjarje të këtij viti. Edhe këtë moment që z. Paloka e hedh duke e ngjyer në helmin e shpifjes, e mban mend mirë. Në fakt, në atë kohë, ne nuk e dinim që Adrian Liçaj shërbente në polici. Ata që kanë qenë atje në atë moment, e kanë parë atë duke i kërkuar Zanit që të mos pengonte qarkullimin për në Vlorë. Kanë debatuar me njeri-tjetrin edhe me zë të lartë, fakt që është parë edhe në stacionet e huaja, ku filmi nuk është prerë dhe biseda është dëgjuar deri në fund. Dhe ishte ndërhyrja e Adrianit me ca shokë të tjerë, që rruga u hap. Rastësisht këtë ngjarje e kemi kujtuar me Frrok Çupin në shtëpinë tonë , kur ai kandidonte për deputet. Pohoj, se familja dhe fisi im në atë kohë mbështeste Frrokun, ndaj edhe ai është ndodhur disa herë tek ne.

Atëherë, pse sulmohet pikërisht Liçaj?

Është e vërtetë që më pas Adriani ka shërbyer në forcat e Rendit, por, që është po aq e vërtetë, se atë sot po e sulmojnë jo si “pjesëtar të bandës“, por si votues i së majtës. Kush e njeh Adrian Liçajn, qeshin dhe tallen me Edi Palokën, sepse e dinë shumë mirë që një djalë si ai nuk bëhet ushtar i asnjë bande, por po të donte, të tjerët mund të bëheshin ushtarë të tij.

Sidoqoftë Zani Çaushi në atë kohë ka patur ndikim të madh në Vlorë dhe nuk vepronte i vetëm, apo jo?

Unë them se shpifja nuk luftohet me  shpifje. Duke ndjekur disa komente për shpifjen që hodhi Edi Paloka në tregun e propagandës pëdë-iste, neveris gjuhën e pistë që është përdorur nga disa, por dua të reagoj me njohjen time për personazhin që kanë gjetur që t´ia kundërvenë deputetit demokrat.

Në atë kohë takimet e Zanit me gazetarë të huaj kanë qënë të zakonshme dhe mund të them, se kanë qënë edhe këta që e legjendarizuan figurën e tij. Të huajt (gazetarët), madje paguanin që t’u organizoje një takim me Zanin. Edhe këta “komentatorë“, shfrytëzojnë këtë fragment filmik për t´iu kundërvenë Edi Palokës duke i thënë se “ushtarin e bandës së Zanit“, e keni në Parlament dhe është në koalicion me ju!… N.q.se do të gjykonim nga këto segmente filmike, mos do të thoshnim se edhe kryeministri italian, Romano Prodi, kur u pa me Zani Çaushin, ishte ushtar i tij ?!..
Intervistoi Xhevdet Shehu