Kanë nisur bisedimet Serbi-Kosovë. Në rundin e sotëm të dialogut ndërmjet Kosovës e Serbisë në Bruksel, me ndërmjetësimin e përfaqësueses së lartë të Bashkimit Evropian për politikë të jashtme dhe siguri, Catherine Ashton, ka filluar takimi i përbashkët trepalësh, ka njoftuar Maja Kocijancic, zëdhënëse e baroneshës Ashton.
Në nisje të takimit të sotëm, kanë biseduar kryeministri i Kosovës, Hashim Thaçi dhe baronesha Ashton, më pas është mbajtur edhe takimi i baroneshës Ashton me kryeministrin e Serbisë, Ivica Dacic, i cili ishte i shoqëruar nga zëvendëskryeministri, Aleksandar Vucic.
Para takimit Thaçi u tha gazetarëve se do të diskutohet për arritjen e marrëveshjes përfundimtare për çështjen e sistemit të drejtësisë dhe “funksionalizimin e plotë në pjesën veriore sipas ligjeve dhe Kushtetutës së Kosovës”, transmeton Rel.
Në këtë kuadër ai theksoi se “në takimin e fundit ne kemi arritur marrëveshje në parim, ndërsa sot pres edhe zyrtarizimin e kësaj marrëveshjeje”.