Partizani nuk arrin të përfitojë nga barazimi i së shtunës midis Skënderbeut e Kukësit, madje pas së dielës janë këto dy skuadra që kanë fituar nga një pikë kundrejt të kuqve. Skuadra e Hasan Likës është mundur 1-0 në Ballsh nga Bylisi, pas golit të shënuar nga Bekim Kuli. Partizani mund të shkonte një pikë larg Skënderbeut në rast fitoreje, por e vërteta është se nuk bëri asgjë për të fituar, ndryshe nga Bylis, që i meritoi tri pikët. Të kuqtë luajtën fort në mbrojtje, duke i lënë gjithë fushën skuadrës vendase dhe ia dolën ta ruanin të paprekur portën në pjesën e parë, por Kuli shënoi menjëherë pas pushimit. Tri pikë tepër të rëndësishme për ballshiotët, të cilët do të rrezikonin shumë në rast të kundërt. Me të njëjtin motiv luante edhe Flamurtari në derbin bregdetar kundër Teutës.
Vlonjatët e dominuan ndeshjen dhe fituan me nga një gol për çdo pjesë loje, ndërkohë që durrsakët u shfaqën edhe një herë zhgënjyes dhe tepër larg formës së shfaqur deri pak javë më parë në kampionat. Roberto Sorrentino, i cili zëvendësoi Gugash Maganin, ende nuk e ka njohur fitoren, madje në tri ndeshje ka pësuar dy humbje në krye të Teutës. Tani skuadra durrsake ka humbur shumë terren me kreun dhe, të paktën për momentin, duhet të përpiqet t’i largohet zonës së ftohtë. Drejt daljes nga kjo zonë ecën Besa, e cila është skuadra me rezultatet më të mira në javët e fundit. Verdhezinjtë e Artan Mergjyshit mundën një rival direkt në luftën për mbijetesë, Kastriotin, falë një penalltie të dhënë me zemërgjerësi nga gjyqtari i ndeshjes. Batha mposhti Ilion Likën nga pika e bardhë, duke shënuar golin e vetëm të ndeshjes. Besa e mbrojti mirë kryesimin dhe portieri i saj Bejtja u shqua si protagonist edhe dje, ashtu si në shumë takime të tjera. Në renditje, Besa ka arritur Lushnjën, e mundur 3-1 në Laç. Skuadra e Stavri Nicës është barazuar me Kukësin, me vetëm një pikë më pak se Partizani, duke qenë kandidate e fortë për një vend në Evropë.
Kategoria Superiore
Java e 14-të
Të shtunën
Kukësi-Skënderbeu 1-1
Popoviç 88′ / Ribaj 87′
Tirana-Vllaznia 1-1
Limani 59′ / Hajdari 34′
Dje
Flamurtari-Teuta 2-0
Lena 20′, Arbri 56′
Bylis-Partizani 1-0
Kuli 54’
Besa-Kastrioti 1-0
Batha 62 (p)
Laçi-Lushnja 3-1
Tanushi 12′, Brkiç 64′, Ndreca 78′ / Çanka 25′ (p)
Renditja
N Skuadra P Gol F B H
1 Skënderbeu 27 21:11 8 3 3
2 Partizani 23 13:11 7 2 5
3 Kukësi 22 15:14 6 4 4
4 Laçi 22 14:13 7 1 6
5 Flamurtari* 20 19:16 7 2 5
6 Teuta 20 18:19 5 5 4
7 Bylis 18 17:14 4 6 4
8 Vllaznia 18 19:17 5 3 6
9 Besa 18 12:11 5 3 5
10 Lushnja 18 14:17 5 3 6
11 Kastrioti 15 10:16 5 0 9
12 Tirana 11 6:16 3 2 9
* Flamurtari -3 pikë