Lorik Cana i ka kërkuar Shkodran Mustafit të largohet nga Gjermania dhe të veshë fanellën kuqezi të Shqipërisë. Të dy u takuan të dielën, në takimin midis Sampdorias e Lacios, ku kapiteni shqiptar shënoi golin e barazimit. Mustafi ka qenë prej kohësh në vëmendjen e kombëtares shqiptare dhe para disa muajsh ishte vetë trajneri Xhani De Biazi që shkoi dhe e takoi në Xhenova. Në atë kohë u duke se italiani ia kishte mbushur mendjen mbrojtësit, por Mustafi ka marrë pjesë në ndeshjet e fundit të kombëtares U-21 të Gjermanisë. “Zhvilluam një bisedë të shkurtër, sepse ndodhën shumë gjëra dhe nuk pata mundësi të rrija gjatë, por gjithsesi i thashë të ndryshonte mendje dhe të luajë për Shqipërinë në të ardhmen”, tha Cana për Supersport. “Ai ka luajtur disa herë me moshat e Gjermanisë, por i kërkova të mos shkonte më, sepse mund të japë shumë për Shqipërinë. Ai është një lojtar me shumë vlera”.