I nderuar lexues! Kryengritja antiosmane e Mirditës (1876-1877) ishte kryengritje e malësorëve të Mirditës kundër vendosjes së administratës osmane. Filloi me kërkesën për respektimin e autonomisë së krahinës, që do të realizohej me kthimin nga internimi të Preng Bibë Dodës, prijësit trashëgimtar. Porta e Lartë e pranoi me shpresë se mund të shfrytëzonte forcën ushtarake të Mirditës në luftën kundër Malit të Zi. Mirditorët nuk pranuan të hidheshin në luftë kundër Malit të Zi dhe kërkuan njohjen zyrtare të autonomisë që do të përfshinte një pjesë të malësive të Veriut. Me ta u bashkuan edhe malësorë të bajraqeve të Matit, Pukës dhe të disa malësive të tjera. Porta e Lartë dërgoi forca të mëdha ushtarake, të cilat e shtypën përkohësisht kryengritjen. Për shtypjen e saj luajtën rol edhe politika austro-hungareze dhe ajo angleze.