Cipras paralajmëron: Për grekët vijnë kohë të vështira

Kryeministri grek Aleksis Cipras deklaroi sot se qeveria e tij u ka dërguar kreditorëve një plan realist reformash të hënën në mbrëmje dhe ka kërkuar që liderët europianë ta pranojnë në mënyrë që të mund të mbyllet marrëveshja e shumëpritur. “Kemi prezantuar një plan realist që Greqia të dalë nga kriza. Një plan, pranimi i të cilit nga institucionet, huadhënësit, dhe partnerët tanë në Europë, të shënojë fundin e skenarit të ndarjeve në Europë”, deklaroi Cipras për shtypin. “Ne nuk presim që ata të paraqesin një propozim në përputhje me vendimin e Eurogrupit. Greqia po dorëzon një plan.

Tashmë është e qartë se, nëse ata duan të përshtaten me realitetin dhe daljen nga kriza pa një ndarje të Europës, vendimi i mbetet udhëheqjes politike të Europës, atyre që zgjidhen dhe japin llogari ndaj popujve për vendimet e tyre”, tha Aleksis Cipras. Deklaratat e tij vijnë pasi kancelaria gjermane Angela Merkel, kryesoi të hënën në mbrëmje në Berlin një takim ku asistuan presidenti francez, Franccois Hollande, presidenti i Bankës Qendrore Europiane Mario Draghi, Presidenti i Komisionit Europian Jean-Claude Juncker dhe Drejtorja e Përgjithshme e Fondit Monetar Ndërkombëtar, Christine Lagarde. Cipras paralajmëroi se qytetarët duhet të përgatiten për kohëra të vështira sapo të mbyllen negociatat.

Megjithatë kryeministri i ri theksoi se grekët duhet të ndjehen krenarë, pavarësisht partisë të cilës i përkasin”. Pohimeve se institucionet i kanë bërë Athinës një ofertë ultimatum, qeveria greke siguroi se nuk ka marrë asnjë draft marrëveshje dhe as nuk ka komunikim mes tij dhe përfaqësuesve të institucioneve. Kreditorët kërkojnë reforma për të përmirësuar ekonominë greke dhe masa kursimi para se të lëvrojnë këstin e fundit të ndihmës prej 7.2 miliardë euro.

Greqia duhet të paguaj këtë javë këstin e parë të borxhit ndaj FMN që arrin shumë e 300 milionë eurove, nga totali prej 1.6 miliardë euro që duhet të kthejë këtë muaj. Nga ana tjetër Komisioni Europian siguron se kalendari i vetëm i përcaktuar për të arritur një pakt është data 30 qershor.

Dështimi për të arritur një marrëveshje gjatë këtij muaji mund të shkaktojë një falimentim të Greqisë dhe të çojë në vendosjen e kontrolleve të kapitalit dhe një dalje të mundshme nga Eurozona, një ngjarje që sipas analistëve, do të kishte pasoja katastrofike për të gjithë. /DITA