Kristiano Ronaldo do të luajë në finalen e Kupës së Spanjës, kundër Barcelonës, vetëm në rast se do të jetë krejtësisht i riaftësuar fizikisht. Trajneri Karlo Ançeloti ka bërë të ditur se nuk do ta rrezikojë aspak portugezin, edhe pse përballë është Barcelona dhe në lojë është trofeu i parë i sezonit. “Kristiano i mungon skuadrës, pasi lojtarët e dinë shumë mirë se pa të është e vështirë. Gjithsesi, skuadra është mësuar të luajë edhe pa të”, tha trajneri italian. Nesër dy skuadrat më të mëdha të Spanjës do të vihen përballë njëra-tjetrës në një tjetër duel që tërheq vëmendjen e gjithë botës, aq më tepër që Kupa mund të jetë trofeu i vetëm i secilës prej tyre në këtë sezon. Reali lufton ende në tre fronte, por në kampionat mban vendin e dytë, ndërsa në Champions League luan kundër Bajernit në gjysmëfinale. Barcelona është jashtë Evropës, ndërsa në kampionat ka mbetur prapa Atletikos kryesues dhe renditet e treta. “Mendoj se do të jetë një takim i luftuar nga të dyja skuadrat, me shumë tension. Shpresoj që skuadra ime të jetë protagoniste, por ndaj kësaj Barcelone nuk është e lehtë që të marrësh kontrollin e lojës”. Në takimin e fundit, Barcelona fitoi 4-3 në Madrid, megjithatë gjërat kanë ndryshuar. Katalanasit po kalojnë momente shumë të vështira, ashtu si dhe trajneri argjentinas Gerardo Martino. Ançeloti e kupton gjendjen e vështirë të kolegut: “Ai është njeri serioz dhe nuk është e lehtë për askënd kur ndodhet në situata të tilla. Këtu në Spanjë puna e trajnerëve kritikohet shumë, pasi një ditë të shikojnë si gjeni dhe ditën tjetër të trajtojnë si katastrofik”. Ndërkaq, javën e ardhshme do të jetë takimi me rivalin kryesor evropian, Bajernin, ku Ançeloti gjithashtu pret luftë të fortë: “Do të jenë dy ndeshje të komplikuara. Champions League është një kompeticion me shkallë të lartë vështirësie, ku për të fituar duhet të mbështetesh shumë edhe te fati”.