Një dhuratë më të mirë për fëmijët nuk kishte për Qershorin e këtij viti në kryeqytet. Është fjala për përurimin e Këndit të Lojërave brenda Parkut të Liqenit Artificial.
Këtë e pamë të gjithë atje, në vend, ku morën pjesë një numër shumë i madh vizitorësh, sidomos të atyre të vegjël (të cilët tani do të kenë një mjedis të kulturuar e të larmishëm), ku mund të lodrojnë dhe të argëtohen më së miri, të ndarë sipas grupmoshave. Bashkia e Tiranës me siguri do ta mbajë premtimin për të krijuar mjedise të tjera të tillë të mrekullueshëm për fëmijët, mbesat dhe nipat tanë. Po veç duhet të dimë edhe ta ruajmë këtë pasuri të madhe.
Pyeta me këtë rast edhe shumë prindër e fëmijë dhe të gjithë shprehnin kënaqësinë e madhe për sa shikonin dhe “shijonin”. Po përgjigjen më të mirë besoj se ma dha një vogëlushe 5 vjeçare, Livia Lashi, quhej ajo: Këtu qenka vetë mrekullia!