Dështon tenderi, mësuesit të detyruar t’i blejnë vetë shkumësat

Viti shkollor 2012-2013 u ka kushtuar shtrenjtë mësuesve të shkollave të mesme dhe 9-vjeçare, të cilët janë detyruar të blejnë shkumësat, për shkak të ndërrimit të dërrasave të zeza, tek të cilat është e pamundur të shkruhet me shkumësat e shkollës.

“Në pothuajse pjesën më të madhe të institucioneve parauniversitare në vend shkumësat nuk kanë munguar, por nuk shkruajnë. Mësohet se paketat e mëdha të shkumësave, disa me ngjyra, ndërsa të tjerët të bardhë, nuk lënë asnjë shënim mbi tabelat e zeza apo tek ato jeshile, në rastet e shkollave që i kanë zëvendësuar tabelat klasike shumëvjeçare të zeza. E megjithatë, ende sot, rreth 9 muaj që kur viti shkollor 2012-2013 është çelur zyrtarisht drejtoritë e shkollave, të mesme por edhe 9-vjeçare nuk kanë marrë asnjë masë. Edhe pse mësuesit e kanë ngritur herë pas here shqetësimin që lidhet me shkumësat, të cilët për shkak se janë të lagur nuk arrijnë të shkruajnë në tabela, drejtuesit janë treguar indiferentë”, shkruan sot gazeta “Shqip”.

Kjo ka bërë që mësuesit të sigurojnë privatisht shkumësat e bardhë, por edhe ato me ngjyra, që kryesisht përdoren për nxënësit e fillores, të cilët preferojnë ngjyrat gjatë shpjegimit të mësimit në tabelë.

“Mësimi ka nisur zyrtarisht në muajin shtator. Imagjinojeni vetë. Po bëhen 9 muaj që ne i blejmë vetë shkumësat në kancelari, para që dalin nga rrogat tona, ndërkohë që Ministria e Arsimit, nëpërmjet tenderit të përvitshëm ka shpallur një firmë fituese, që i ka shitur MASH-it shkumësat. Përderisa ministria ka paguar një fond parash, që nuk është i vogël, duhet të kërkojë llogari për mallin që blen, që në këtë rast ka qenë me shumë mundësi i skaduar përderisa nuk shërben për asgjë. Duke ditur shqetësimin tonë, duke ditur që ne po paguajmë dyfish për të njëjtin mall, që në këtë rast janë shkumësat si drejtoritë e shkollave si Ministria e Arsimit hesht, në një kohë që duhet të ndëshkojë kompaninë fituese që ka shkelur pikat e kontratës të nënshkruar me MASH, pika që parashikohen në marrëveshjen e tyre me shkrim, procedurë që ndiqet në çdo tender”, citon gazeta një mësuese matematike në një nga shkollat e mesme të Tiranës. “Më duhen të paktën 30 shkumësa në 2 javë. Çmimet e tyre në kancelari për xhepat tonë janë të kushtueshëm. Shpenzoj të paktën 300 lekë të reja në 2 javë, bëjeni llogari sesa më duhen në muaj, në disa muaj apo edhe në 1 vit. Ndoshta disave kjo pagesë mund të mos i duket shumë, por për rrogat tona ta papërfillshme është shumë. Fundja unë nuk kam asnjë lloj detyrimi të paguaj privatisht për një shërbim që duhet ta ofrojë vetë shkolla. Maturantët e mbyllën vitin shkollor, dy ditë më parë, por mësimi vijon normalisht për pjesën tjetër të nxënësve, për klasën X dhe XI, kështu që blerja e shkumësave do të vazhdojë të bëhet prej nesh deri në muajin qershor. Më duket totalisht e padrejtë”, thotë ajo.