“Det gjaku” në Kiev, BE: Përgjegjësi kryesor, Yanukovich

Ajo që tashmë konsiderohet një lufte civile në Ukrainë, shkaktoi vetëm të enjten vdekjen e 100 personave (sipas burimeve të cituara nga CNN) dhe plagosjen e 500 të tjerëve. Ministrat e Jashtëm të BE-së ranë dakord të imponojnë sanksione mbi zyrtarët ukrainas “përgjegjës për nivelin alarmant të dhunës”.

Pakti i arritur mbrëmjen e së mërkurës midis presidentit ukrainas, Viktor Yanukovich dhe liderëve të opozitës për fundin e përballjeve fizike midis manifestuesve dhe forcave të sigurisë, u thye të enjten me rifillimin e konfrontimeve.

Mbërrijnë sanksionet 

Në një takim urgjent të zhvilluar të enjten në Bruksel, ministrat e Jashtëm të BE-së shprehën “tronditjen” për stadin e dhunës të ditëve të fundit në Kiev dhe ranë dakord të pezullojnë vizat për zyrtarët e lartë që i shërbejnë represionit të brendshëm. BE ka vendosur të vijojë edhe me ngrirjen e pasurive të tyre në shtetet e unionit.

Vendimi u mor pas një takimi të zhvilluar midis ministrave të Jashtëm të Polonisë, Gjermanisë dhe Francës, të cilët nga Brukseli u zhvendosën në Kiev. Po ashtu, Këshilli i Jashtë i BE-së e bëri presidentin ukrainas si përgjegjësin kryesor të tensioneve ekstreme në vend: “Përgjegjësia e parë e situatës aktuale bie drejtpërdrejt mbi presidentin Yanukovich dhe autoritetet ukrainase, të cilëve iu takon edhe hapi i parë për të rifilluar dialogun me protestuesit”, u shpreh shefja e politikës së Jashtme të BE-së, Kethrin Eshton, ndërsa shtoi se zbatimi i masave “do të çohet përpara duke parë vijimësinë e zhvillimeve në Ukrainë”.

 Lista e zezë e SHBA-së

Me përshkallëzimin e dhunës, pozicioni i presidentit ukrainas bëhet tani edhe më i vështirë.  Uashingtoni, gjithashtu ka marrë masa paralele me Bashkimin Evropian. Administrata e Shteteve të Bashkuara ka krijuar një listë të zezë me 20 funksionarë të lartë ukrainas, të konsideruar si përgjegjës për përplasjet e ditëve të fundit në Kiev. “Lista e zezë” nënkupton persona të padëshiruar për SHBA-të, – bëri të ditur Departamenti i Shtetit, pa cilësuar emrat e zyrtarëve në fjalë.

Rusia kundër rrymës

Por Moska duket se shtyn në pozicion të kundërt. “Do të bashkëpunojmë me autoritetet legjitime në gjendje që të mbrojnë interesat e shtetit. Nevojitet që partnerët tanë të kenë autoritet për të rivendosur rendin dhe qetësinë dhe që pushteti në Ukrainë të jetë legjitim dhe efikas” , u shpreh të enjten kryeministri rus, Dimitri Medvedev.

Policia e Transcarpazias nga ana e manifestuesve

Sipas “Gazeta.ru”, forcat e sigurisë në Transcarpazia, rajon jug-perëndimor në Ukrainë kanë kaluar nga ana e manifestuesve. Gazeta shkruan se komandantët rajonalë dhe ata të trupave specile dolën në protesta bashkë me popullin para pallatit të rajonit.

Dorëhiqet kryebashkiaku i Kievit

Sipas disa burimeve lokale, rreth 50 policë u kapën në ndërtesën e kompanisë shtetërore të Energjisë, në afërsi të bashkisë. “Situata në kryeqytetin ukrainas ka dalë jashtë kontrollit. Është mirë të kufizohet përdorimi i automjeteve dhe të qëndrohet në shtëpi. Këto masa sigurie janë të nevojshme sepse rrugët e Kievit janë të zaptuara nga njerëz të armatosur dhe të dhunshëm”, nënvizoi ministri i Brendshëm i Unkrainës. Kryebashkiaku i Kievit, një nga “besnikët” e Yanukovich-it dha dorëheqjen nga partia e tij për të protestuar kundra agresionit të shpërthyer./D.Gjuzi