Një ‘grackë juridike’ me aksionin në bregdet

Një shkresë e cila mban datën 24.10.2013 e lëshuar nga Bashkia e Vlorës ngre dyshime të forta lidhur me veprimet e kryebashkiakut Gjika në aksionin e prishjeve në bregdet, ku spikati prishja e godinës që u njoh në media si pallati i Bashës në Vlorë.

Shkresa, e cila publikohet sot për herë të parë nga DITA, tenton të ndalojë aksionin, duke kërkuar që “vendimi të merret nga INUK” ndërkohë që vetëm disa ditë më parë po Gjika kishte firmosur për prishjen dhe INUK e kishte marrë vendimin. Në mënyrë dinake, ndërkohë, vihet re se shkresa e dytë që anulon të parën është firmosur nga një prej vartësve të Gjikës, dhe jo nga Gjika vetë.

Duke gjykuar nga përmbajtja shkresa në fakt, ka tentuar qartazi të fuste procesin e prishjeve në një kurth, të ngjashëm me ato që u prodhuan dikur me shumicë për t’i dhënë Bashës postin e kryebashkiakut në tavolinë. E thënë shkurt shkresa e parë e Bashkisë së Gjikës ka dhënë okejin ligjor për prishjet, kurse shkresa e dytë (po nga Bashkia), kërkon “shpalljen të pavlefshme” të shkresës së parë. Është e qartë që në kontekstin e përplasjes së atyre ditëve, shkresat kundërthënëse të Gjikës e ndihmonin retorikën politike të PD-së dhe jo vetëm kaq: shkresa e parë ofronte bazën ligjore për të futur qeverinë në aksion, kurse shkresa e dytë e shpallte këtë aksion të pavlefshëm – në zhvillim e sipër.

A është ky një veprim i Gjikës i shtyrë nga të njëjtat impulse që dyshohet se i dhanë ngjyresa politike atentatit me tritol në oborrin e kryeministrisë, apo ka patur, siç thuhet në Vlorë, një pakt Gjika-Basha për t’i ngritur një “grackë juridike” organizatorëve të aksionit, kjo mbetet për t’u parë.  Aq më tepër që shkresa e dytë e Gjikës është prodhuar pasi INUK-u i kishte kthyer tashmë përgjigje shkresës së parë të Gjikës dhe vendimi për prishjen ligjërisht ishte marrë. Shih dy faksimilet:

Sot, gjyqi ndaj Gjikës – i mbartur në Tiranë

Ndërkohë, sot në orën 10 në Gjykatën e Tiranës do zhvillohet seanca gjyqësore ndaj kryebashkiakut të Vlorës dhe të pandehurve të tjerë. Shpëtim Gjika, Eleni Dardhaj, Blerdi Licaj, Gentjan Sherifaj dhe Gëzim Feta do gjykohen bashkë në Tiranë, kurse 3 të pandehur të tjerë do vijojnë të gjykohen në Vlorë. Gjyqi u mbart nga Vlora në Tiranë në 6 janar, dhe sot akuzën do ta mbrojnë përballë gjyqtarit Arben Micko, prokurorët e Vlorës Aurel Zarka dhe Klodjan Braha.

Prokuroria e Rrethit Gjyqësor Vlorë ka dërguar për gjykim kërkesën ndaj 8 të pandehurve, ndër të cilët edhe për Shpëtim Gjikën, të gjithë të akuzuar për veprat penale të “fallsifikimit të dokumentave” dhe “ndërtim të paligjshëm”.

Pas një hetimi, të nisur në shkurt 2013, prokuroria e Vlorës deklaron se arriti të provonte që i pandehuri Shpëtim Gjika, në cilësinë e Kryetarit të KRRT-së së Bashkisë Vlorë, në bashkëpunim më të pandehurën Eleni Dardhaj, në cilësinë e punonjëses në Drejtorinë e Planifikimit të Territorit pranë Bashkisë Vlorë, kanë falsifikuar përmbajtjen e dy proces verbaleve të mbledhjes së KRRT-së së Bashkisë Vlorë, përkatësisht të datës 24.03.2010 dhe 15.07.2010.

Këto dokumenta, të prodhuara nga dy të pandehurit, kanë në përmbajtje të tyre rrethana të rreme. Dy lejet e ndërtimit që përmenden në këto dokumenta sikur janë marrë në shqyrtim dhe janë miratuar nga KRRT-ja e Bashkisë Vlorë, në të vërtetë nuk janë shqyrtuar dhe nuk janë miratuar nga KRRT-ja e Bashkisë Vlorë.

Në bazë të të dhënave të rreme, të prodhuara nga të pandehurit, është dhënë leje ndërtimi:

– për kompleks banimi dhe shërbimi 13-kate me parkim nëntokë me pronarë të truallit të pandehurit Aleks Ahmetaj, Artan Ferrati, Mustafa Tartari, me subjekt ndërtues “Deco System” sh.p.k, me përfaqësues ligjor të pandehurin Blerdi Liçaj.  Vendi për të cilin, sipas këtij dokumenti të rremë, është lejuar kryerja e ndërtimit të mësipërm, ndodhet në bulevardin qëndror Vlorë-Skelë, në afërsi të Teatrit “Petro Marko”, në vëndin e quajtur “Tre Rasat”, Vlorë. Duhet theksuar se në këtë zonë nuk lejohet të ndërtohet. Po ashtu, në bazë të të dhënave të rreme, është dhënë leje ndërtimi:

– për një godinë banimi dhe shërbimi 2-6 kate+papagingo, me një kat nëntokë, në lagjen Pavarësia, me pronar trualli të pandehurin Gëzim Feta e subjekt ndërtues EN-BJO sh.p.k, me përfaqësues ligjor të pandehurin Gentian Sherifaj. Vendi për të cilin, sipas këtij dokumenti të rremë, është lejuar kryerja e ndërtimit të mësipërm ndodhet në lagjen “Pavarësia”, brenda territorit të Portit Detar Vlorë. Duhet theksuar se në këtë zonë nuk lejohet të ndërtohet.

Sa më sipër, të pandehurit Shpëtim Gjika dhe Eleni Dardhaj janë akuzuar për kryerjen e veprës penale “falsifikimi i dokumentave”, të kryer në bashkëpunim, të kryer dy herë, të parashikuar nga neni 186/3 dhe 25 të K.Penal.

Të pandehurit Gëzim Feta, Gentian Sherifaj dhe Blerdi Licaj janë akuzuar për kryerjen e veprave penale “falsifikimi i dokumentave” dhe “ndërtimi i paligjshëm” të kryer në bashkëpunim, të parashikuara nga neni 186/1, 199/a/1 e 25 të K.Penal. Ndërsa, të pandehurit Mustafa Tartari, Artan Ferati dhe Aleks Ahmataj janë akuzuar për kryerjen e veprës penale “ndërtimi i paligjshëm” të kryer në bashkëpunim, të parashikuara nga neni 199/a/1 e 25 të K.Penal.

Ndërkohë, Prokuroria e Vlorës po vijon hetimin edhe për disa raste ndërtimesh të tjera të paligjshme, ku dyshohet se janë të përfshirë subjekte të ndryshëm ndërtues dhe drejtues të zyrës së ALUIZNI-t të këtij qyteti.