Duhet guxim zoti Rama

Rama dhe qeveria e tij duhet të gjejë mënyrat që të zhduket nga mendja e shqiptarëve mendimi se kush është në pushtet mund të bëjë ç’të dojë, pra që nuk i hyn asnjë gjëmb në këmbë. Po nuk u realizua kjo sa më shpejt, ju dhe qeveria juaj zoti Rama, do humbisni shumë shpejt besueshmërinë e shqiptarëve që ju besuan të drejtoni punët e shtetit.

Po nuk vepruat siç edhe premtuat, shqiptarët do mendojnë se ju harruat 3000 të vrarët e vitit të zi 1997, harruat të mbyturit në Otranto më 28 Mars 1997, harruat 26 të vrarët e Gërdecit më 15 Mars 2008, 4 të vrarët më 21 Janar 2011 në bulevard para Kryeministrisë, do mendojnë se ju e harruat se Saliu e Lulzimi i dhuruan Greqisë 300 km² det, që përbën edhe tradhëti kombëtare. Mos harroni se nga Shqipëria thuhet se kanë dalë miliarda që duhet të ishin në bankën e shtetit shqiptar. Përveç të tjerëve, edhe Ardian Fullani  e bashkëpuntorët e tij, për këtë e të tjera pisllëqe duhet të japin llogari para drejtësisë.

Për këto dhe të tjera krime kundër Shqipërisë, populli pret drejtësinë e munguar. Mos harro se ke pas vetes një popull vital që të do e të pruri në pushtet, fol me të hapur dhe ai do bëjë të pamundurën për të ndihmuar planet e qeverisë, atëhere kur t’i quajë këto plane edhe të vetat. Ec me guxim përpara, pengesa do kesh shumë, mos u tërhiq, kush guxon, vetëm fiton!

Letër e nënshkruar

Nazmi Brati, Vlorë.