Vazhdojnë sinjalet e afrimit të LSI-së me PS-në. Siç raporton e përditshmja “Shqip”, kreu i PS-së, Edi Rama, ka festuar mbrëmë në Durrës së bashku me eksponentë të lartë të Lëvizjes Socialiste për Integrim.
Festa është organizuar nga kreu i grupit parlamentar të LSI-së, Lefter Koka, në një lokal te Ura e Dajlanit, ku ka marrë pjesë i vëllai, Nard Koka, anëtari i kryesisë së LSI-së, Spartak Braho, anëtari i Asamblesë së PS-së, Agron Duka etj. Surpriza ka qenë momenti i shfaqjes së kreut të PS-së, Edi Rama, i cili i është bashkuar festës me të pranishmit. Ardhja e papritur e Ramës (një vendim i marrë së bashku me organizatorët) është pritur mirë nga pjesëmarrësit, të cilët nuk i kanë kursyer thirrjet “Edi Rama kryeministër”, “Edi Rama, Lefter Koka” etj. Ndërkohë, gëzimit të festës i është bashkuar edhe një urim nga larg i kryetarit të LSI-së, Ilir Meta.