Ferdinando Scianna, fotografi i njohur, anëtar i Agjencisë Magnum, ishte këto ditë në një aktivitet në Tiranë. Ai ka vizituar vendin tonë në kapërcyell të viteve ’90 dhe më pas në vitin ’91 dhe fotot e tij sjellin një tablo të Shqipërisë komuniste dhe të Shqipërisë post-komuniste duke sjellë foto nga eksodi i vitit 1991. Për herë të parë, fotografi italian mbërriti në Shqipëri gjatë periudhës së regjimit komunist në vitin 1984, përvojë që sot ka lënë një arkiv tepër të çmuar të dokumentimit të Shqipërisë komuniste, të parë nga një sy kritik dhe i stërvitur mirë i një fotografi profesionist. Më pas për llogari të agjencisë Magnum, Scianna fiksoi në foto edhe eksodin e parë të shqiptarëve në vitin 1991. Këtë herë vjen në kuadër të “Ditëve të fotografisë italiane në Tiranë”, një projekt i organizuar nga një kompani shqiptare e fotografisë në bashkëpunim me Institutin Italian të Kulturës.
