Fakulteti i Gjeologji-Minierës, në hall për bazën laboratorike

Mungesa e bazës laboratorike po pengon përgatitjen e profesionistëve të rinj në fushën e gjeologji minierave. Në nisje të vitit të ri akademik 2013-2014, krahas mungesës së ambienteve drejtuesit e Fakultetit të Gjeologji Minierave vënë në dukje se një ndër problemet madhore me të cilat po përballet ky fakultet është mungesa në infrastrukturën laboratorike. Prezenca e të cilave është vendimtare në formimin e profesionistëve të rinj.

Ndërkohë që edhe baza aktuale laboratorike është aq e vjetruar, çka pengon zhvillimin e rregullt të procesit të mësimit në përgatitjen e ekspertëve të rinj, të cilët pjesën dërrmuese të ditëve të mësimit, duhet ta kalojnë në këto laboratorë. Kundrejt kësaj problematike dekani i fakultetit Përparim Hoxha, shton se për të kompletuar bazën laboratorike të departamenteve përkatëse nevojiten të paktën 200 milion lekë, kjo në mënyrë që laboratorët të jenë ën shërbim të studentëve. “Ajo që kam si shqetësim është në pjesën laboratorike.

Pak askses kanë studentët sepse ne kemi sasira të pakta laboratorike. i ruajmë me kujdes edhe ato që kemi sepse po na u prishën edhe këto nuk kemi mundësi t’i rigjenerojmë apo t’i blejmë përsëri. Kemi nxjerrë nevojat për infrastrukturën laboratorike për burimet humane për infrastrukturë të procesit arsimor dhe na duhen rreth 200 milion lekë të reja”, vë në dukje dekani Hoxha.

Sipas tij, studentët dhe fakulteti nuk mund t’i shpëtojnë mësimit me turne as gjatë këtij viti akademik. Për shkak të shtimit të pranimeve të reja dhe mungesës së ambienteve studentët janë të detyruar që procesin mësimor ta zhvillojnë me turne deri në orët e vona të mbrëmjes. “Auditoret përdoren me dy ndërresa deri në orën 8 të darkës, sistemet e infrastrukturës përsëri kanë nevojë plotësimi”, shton Hoxha.

Gjatë viteve të fundit është rritur numri i studenteve që kërkojnë të ndjekin këtë fakultetet, shkak për të cilën bëhet tendenca e tregut të punës. dekani, Hoxha më tej vë në dukje se gjatë viteve të fundit tregu i punës kërkon specialistë në miniera, në rafineritë e naftës, por edhe në fushën e burimeve  natyrore. Kërkesa, të cilat gjithashtu janë shoqëruar me shtimin e numrit të femrave që vijojnë studimet në këto degë, duke zënë rreth 60 për qind të numrit të kandidatëve që vijojnë studimet e larta në programet e këtij fakulteti.