Nuk ka vend për alarm, Partizani do të luftojë deri në fund të kampionatit për titullin kampion. 6 pikë diferencë nga Skënderbeu janë të rikuperueshme për mbrojtësin e të kuqve, Arbnor Fejzullahu, i cili u shpreh me nota optimiste në ditën e 23 vjetorit të tij të lindjes: “Unë mendoj që do të shpallemi kampion këtë sezon, sepse 6 pikë diferencë nuk janë shumë edhe për faktin se këtë javë Skënderbeu ka një ndeshje shumë të vështirë në Kukës. Shpresoj që të marrim tre pikët tona që t’i afrohemi sa më shumë Skënderbeut”.
Shtatlarti i repartit të tërhequr theksoi se zërat e merkatos nuk e shqetësojnë aspak pasi mbetet i fokusuar te Partizani, ndërsa bëri një koment edhe për polemikat e ditëve të fundit ku trajneri Andrea Agostinelli aludoi për tolerim të Laçit ndaj rivalit direkt, Skënderbeut. “Ndaj nesh Laçi bëri detyrën dhe unë nuk mund të komentoj formacionin që zgjedh trajneri i tyre. Ne nuk duhet të shikojmë aleancat që bëjnë ekipet e tjera dhe duhet të përqendrohemi te vetja jonë”, pohon Fejzullahu.
Transferta e radhës do të luhet në Vlorë, ku Partizani sfidon Flamurtarin në krizë rezultatesh, por Fejzullahu kërkon që skuadra të jetë e fokusuar për të mos hedhur një tjetër hap fals. Ai thotë: “Normalisht edhe për ne është një ndeshje e vështirë. Flamurtari ka një skuadër të mirë, pavarësisht ecurisë. Kemi vuajtur në Vlorë në të shkuarën, por këtë herë kërkojmë të arrijmë te fitorja”.
Sfida mes kryeqytetasve dhe skuadrës vlonjate do të luhet të dielën në orën 19:00 në stadiumin “Flamurtari”.