Një flamur gjigand kuqezi po përgatitet në Prishtinë, teksa do të shpaloset ditën kur Shqipëria do të përballet në ndeshjen me Francën, më 15 qershor. Ideja është nisur nga një i ri nga Dibra, me emrin Rinor Sllovas dhe flamuri do të shihet prej të gjithëve në ndeshjen e dytë të Kombëtares në Kampionatin Europian.
Arsyeja se përse ky flamur nuk do të jetë në ndeshjen e parë me Zvicrën më 11 qershor është se përmasat e tij nuk përballohen nga tribuna e stadiumit ku do të zhvillohet takimi.
Lejen për paraqitjen e tij tifozët tashmë e kanë marrë nga shteti francez, ndërsa të angazhuar në shpalosjen e flamurit do të jenë mbi 500 persona. Edhe pse nisi si ide e Rinorit, gjatë rrugës ajo gjeti shumë përkrahës nga të tria shtetet ku jetojnë shqiptarët. Ndihmë po jepet veçanërisht nga “Tifozët Kuq e Zi”.
Projekti po realizohet me forcat vetjake të pjesëmarrësve dhe për punimin e tij janë shpenzuar rreth 15 mijë euro deri më tani.
Nuk mungojnë asnjëherë. Dje e kanë treguar se janë pranë Kombëtares edhe në stërvitje. “Tifozët Kuq e Zi” kanë surprizuar skuadrën në Bergamo, duke qenë të pranishëm në seancën e parë postmiqësores me Ukrainën. Ultrasit do të jenë të cunguar në Europian, pasi nuk kanë marrë bileta në grup për të gjithë anëtarët.