Komisionet e Integrimit Europian të vendeve të Ballkanit Perëndimor u mblodhën sot në Sarajevë.Kryetarja e Komisionit parlamentar të Integrimit Majlinda Bregu e pranishme në këtë takim, bën të ditur se propozimi i saj për krijimin e një forumi të Parlamenteve të Ballkanit Perëndimor brenda Procesit të Berlinit, është mbështetur nga Parlamenti Europian, Komisioni Evropian dhe ndërkohë po ndiqet nga MPJ dhe Asambleja Kombëtare e Francës për ta mundësuar në samitin e Parisit këtë verë.
“Ndoshta krizat mund ta afrojnë Ballkanin me Europën, por vetëm nëse Europa do t’i rijapë formë angazhimit të saj në Ballkan, atij angazhimi të bërë në ditët kur Europa kishte më shumë vetëbesim te politika e zgjerimit. Plane e afate të qarta, mesazhe direkt e jo të sheqerosura për mungesën e reformave ose vlerësim të tyre, por, mbi të gjitha, një angazhim në terma ekonomike. Rajoni është tashmë nën një mozaikë prezence të investimeve të huaja nga Rusia e Azia dhe, për të ruajtur investimin afatgjatë për sigurinë e kontinentit vendimmarrja e BE-së nuk mund të mjaftohet me deklarata se çfarë mund të ndodhë pas pesë vitesh, kur rëndësi të dorës së parë ka rinovimi i premtimit të BE-së drejt Ballkanit Perëndimor”, shkruan Bregu në rrjetin social ‘facebook’.
Gjithashtu, shton Bregu, po aq rëndësi ka që secili vend duhet të dëshmojë përgjegjësi dhe vullnet politik në zbatimin e detyrimeve.