Publikohet sot Kodi i Emigracionit, karakteristikë kryesore e të cilit është zbatimi i udhëzimit për “rezidentët afatgjatë”, për gjithë emigrantët që punojnë prej vitesh ligjërisht në Greqi.
Nga ky udhëzim që është inkuadruar në legjislacionin grek që në 2006, por që fillon zbatimin tani, përfitojnë kryesisht emigrantët që posedojnë lejen dhjetëvjeçare të qëndrimit. Kushdo që do të marrë lejen e rezidentit afatgjatë, do të ketë të drejtën të punojë në mënyrë të ligjshme në gjithë vendet anëtare të BE, përderisa udhëzimi i Komisionit Europian konsiston në qarkullimin e lirë të qytetarëve.
Gjithashtu, me Kodin e Emigracionit, statusi i rezidentit afatgjatë do t’u jepet edhe fëmijve të emigrantëve që kanë prej vitesh qëndrim të ligjshëm në Greqi.
Konkretisht, të gjithë fëmijtë e rritur do të marrin lejen e rezidentit afatgjatë dhe do të kenë mundësinë ta rinovojnë për një pesëvjeçar tjetër, kështu që në vazhdim të vendosin nëse do të qëndrojnë në Greqi dhe nëse do të kërkojnë marrjen e nënshtetësisë greke.