Ekspertiza e Fierit: Vdekja e Karelit, si pasojë e goditjeve

 (Plotësuar)

U përcoll sot për në banesën e fundit në fshatin Zhupan të Fierit  shqiptari që humbi jetën në një burg të Greqisë Ilia Kareli.  Trupi i  pajetë i viktimës shoqërohej nga qindra njerëz që mbanin në duar flamurin kombëtar.

Gjatë ditës trupi i pajetë i Ilia Karelit iu nënshtrua një ekspertize të re mjeko-ligjore në morgun e Fierit, pas pretendimeve të familjarëve se, e kanë keqtrajtuar në mënyrë monstruoze, deri sa i kanë shkaktuar vdekjen në burgun grek. Rezultatet e autopsisë së trupit të 42-vjeçarit treguan se vdekja e tij erdhi si pasojë e traumave nga goditjet. Sipas ekspertizës mjeko-ligjore Kareli kishte thyerje në kafazin e kraharorit dhe lëndime të shumta në trup. Në Greqi kanë nisur hetimet mbi çështjen, po merren në pyetje gjithë zyrtarët e burgut, po këqyren kamerat e sigurisë, si dhe dokumentacioni i burgut.

—–

Një ekspertizë mjeko-ligjore në morgun e qytetit të Fierit ka bërë autopsinë e trupit të pajetë të Ilia Karelit. Familjarët e Ilia Karelit pretendojnë se djali i tyre  është keqtrajtuar në mënyrë monstruoze, deri sa i kanë shkaktuar vdekjen në burgun grek. Ekspertiza u krye nga një grup prej 3 ekspertësh mjeko-ligjorë, dy nga Tirana dhe një nga Fieri. Rezultatet e ekspertizës pritet të publikohen gjatë orëve në vazhdim, ndërsa Prokuroria e Fierit ka nisur hetimet për vdekjen e Karelit.

Familjarët e tij, pretendojnë se Ilia Karelit i kanë nxjerrë edhe sytë, ndërsa nga 3 goditje të regjistruara në ekspertizë, ata kanë gjetur 15 të tilla në trupin e tij.

Familjarët e tij kishin paralajmëruar një protestë në qendër të qytetit me arkivol, por nëna e Karelit kërkoi që trupi i të birit të dërgohej në shtëpi, në fshatin Zhupan të Fierit.

Ilia Kareli u gjet i vdekur mbrëmjen e 27 marsit në qelinë e burgut të Nigritas në Serres, ku ishte transferuar për izolim dhe mbrojtje, pasi vrau me thikë më 25 mars gardianin e burgut të Malandrinos.

Rezultatet e autopsisë së trupit të 42-vjeçarit treguan se vdekja e tij erdhi si pasojë e traumave nga goditjet. Sipas ekspertizës mjeko-ligjore Kareli kishte thyerje në kafazin e kraharorit dhe lëndime të shumta në trup.

Në Greqi kanë nisur hetimet mbi çështjen, po merren në pyetje gjithë zyrtarët e burgut, po këqyren kamerat e sigurisë, si dhe dokumentacioni i burgut.

* * *

Letra e Karelit: Më detyruat të marr një nga jetët tuaja

Ilia Kareli, para vrasjes së gardianit në burgun e Malandrinos, kishte shkruar një letër të shkurtër ku akuzonte autoritetet se i kishin shkatërruar jetën dhe se tani ai ishte i detyruar të merrte jetën e njërit prej tyre. Letra është publikuar nga e përditshmja greke “To Vima”. Letra i adresohej drejtorisë së burgut, por në fakt i ishte lënë në dorë gardianit Jorgos Cironis, pak sekonda para se Kareli t’i merrte jetën.
Në letrën e plotë të botuar në të përditshmen “To Vima” shkruhej ndër të tjera:

Drejtorisë së burgut, Malandrino

Më mbani kot në burg për kaq kohë, kaq shumë vjet, vetëm për vjedhje, duke mos qenë se kam vrarë ndonjë njeri. Përse?

Përse nuk më latë të shkoj në shtëpinë time, të gjej të gjallë nënën time, përse? Përse nuk më latë të krijoja edhe unë familjen time, përse?
Jam brenda që nga viti 1997 dhe nuk u ngopët kaq vjet me jetën time?
Deri tani e kam shlyer burgimin e përjetshëm dhe 4 vjet punë. Me gabimin që kam bërë nuk më takonin kaq vjet dënim dhe akoma vazhdoni të më mbani, përse?
Sepse tani duhet që unë detyrimisht të marr një nga jetët tuaja.
Përse më morët gjithë jetën time, përse, përse, përse?”, përfundon letra e Ilia Karelit.

* * *

Nëna: S’më lanë ta takoja të gjallë, të paktën sillni trupin

Nëna e shqiptarit të vrarë barbarisht në burgun grek të Nigritas ka kërkuar drejtësi dhe i bën apel shtetit që të paktën t’ia sjellë trupin e të birit që s’e lanë ta shihte sa ishte gjallë, që t’i bëjë nderimet e fundit siç dhe i takojnë. Resmije Kume, nga fshati Zhupan i Fierit, ndërsa ka hapur dyert e mortit për të birin Kudret Kume, që njihej në Greqi me emrin Ilia (Ylli) Kareli, kërkoi po ashtu nga shteti shqiptar të kthejë trupin e tij në atdhe. Ajo rrëfen se disa herë ka udhëtuar në Greqi për t’u takuar me të birin në burg, por asnjëherë nuk e kanë lejuar për arsye të panjohura dhe pa asnjë argument juridik.

Rrëfimi i nënës

“Asnjëherë nuk më kanë lejuar ta takoj. I vajti thika në eshtër që e bëri atë krim, t’i jepnin dënim, por jo ta masakronin. Unë jam e vdekur për vete. Ai bënte kërkesa për të më takuar, asnjëherë nuk e lejuan. Arsye tjetër nuk besoj të ketë pasur, vetëm për këtë e bëri”, rrëfen ajo. Ilia Kareli, apo siç njihet në vendlindjen e tij Kudret Kume, prej 1997 ishte burgosur në burgjet greke për një sërë akuzash. “Unë tani kërkoj të më sjellin trupin që t’i bëj nderimet sipas zakonit dhe gjithashtu dua drejtësi për ata që ma vranë”, ka thënë e moshuara, që shton se kishte 12 vjet pa e takuar të birin. Ditë më parë ai kërkoi leje për të takuar nënën e tij, e cila ishte e sëmurë, por pas refuzimit të radhës që ju bë nga autoritetet, në shenjë proteste, shqiptari vrau një gardian në burgun e Malandrinos, duke i prerë fytin. Pas ngjarjes, Kareli akuzoi drejtësinë greke se nuk po e lejonte të takonte familjarët. Pas marrjes në pyetje, 42-vjeçari u transferua në një burg tjetër, atë të Nigritas, ku gjeti edhe vdekjen nga torturat barbare të gardianëve dhe hetuesve. Ekzaminimet mjeko-ligjore treguan se u rrah në mënyrë brutale nga policët grekë që i thyen kafazin e kraharorit me shkop gome, ndërsa ka dyshime se përdorën dhe elektroshokun, si hakmarrje për vrasjen e gardianit grek.

 Hetimet në Greqi

Në Greqi, vijojnë hetimet mbi vdekjen e të burgosurit shqiptar, Ilir Kareli. Sipas ekspertëve mjeko-ligjorë, vdekja ka ardhur si pasojë e plagëve të shumta, që ai kishte marrë dhe qe i kane shkaktuar fraktura, përfshirë një thyerje të dërrasës së kraharorit. Pikërisht kjo e fundit ka shkaktuar komplikacione në zemër, që kanë çuar përfundimisht në vdekjen e të burgosurit. Për të saktësuar përfundimisht shkaqet e vdekjes, do të duhet të kryhen edhe analiza toksikologjike, rezultatet e të cilave do të dalin pas rreth një muaji. Agjencia greke zyrtare e lajmeve, ANA-MPA, ka cituar kryesindikalistin e gardianëve të burgut të Nigritas, sipas të cilit Kareli ishte goditur para mbërritjes në atë burg. “I burgosuri kishte shenja goditjesh kur erdhi në burg. E fotografuam dhe këto fotografi tashmë janë në duart e autoriteteve”, ka thënë gardiani, duke shtuar se Kareli refuzoi trajtimin mjekësor, ndërsa akuzonte prokurorin.