Letër e nënshkruar
Pali Nito
Mos të rëntë halli të kesh ndonjë problem për ta zgjidhur në sektorin e arkivave. Për problemin tim fillimisht u paraqita tek informacioni i Ministrisë së Mbrojtjes ku punonjësja më rekomandoi të shkoja tek
arkivi. U paraqita atje. Më priti një zonjë e paaftë dhe e papërgjegjshme. I thashë që më duhen 5 vite shërbimi si n/oficer nga viti 1965 deri më vitin 1971. Pasi meditoi dhe hamendësoi një çast më tha: Shko
dhe pyet në arkivin e Ministrisë së Brendshme. Pasi u ktheva nga institucioni që më rekomandoi shkova përsëri dhe i thashë se nuk gjeta gjë atje. Me një indiferencë të ngulitur në mimikë më tha: nuk di se çfarë të them por ti mund të hapësh një gjyq (!). Sherri do nge dhe gjyqi do para – thotë populli. U largova nga arkivi i ushtrisë dhe rastësisht takoj një kolegun tim. Zgjidhja paskësh qenë shumë e thjeshtë. Shko tek Qëndra e Personelit të Rekrutimit të Ministrisë së Mbrojtjes. Tek QPR-ja ishin pasqyruar saktësisht
e qartësisht se çfarë më duhej. Falenderoj përzemërsisht komandantin dhe gjithë stafin që më shërbyen e më ndihmuan. Hallal i paçin lekët e taksapaguesve.