Harta përfundimtare, Shqipëria do të ketë 61 njësi vendore

Harta e re territoriale e Shqipërisë do të ketë 61 Bashki. Ky është vari­anti përfundimtar i mi­ratuar nga Komisioni parlamentar i Reformës Administrativo-Territori­ale, i cili mbylli veprimtarinë e tij edhe me pjesëmarrjen e një partie të opozitës.

Ndarja e re territoriale e Sh­qipërisë, i përafrohet variantit të 5-të të mazhorancës me 63 njësi, edhe pse aktualisht më i diskutu­ari për shumicën, ishte varianti me 47 njësi vendore. Ky ndryshim i mazhorancës në mbledhjen e fundit të komisionit, vjen si një konsensus i ofruar edhe një herë ndaj opozitës, duke pasqyruar propozimet e dhëna nga opozita.

Sipas ministrit përgjegjës Bledi Çuçi, harta e re do të ketë 61 bash­ki, çka do të thotë se variantit me 47 i janë shtuar edhe 14 bashki të tjera nga veriu deri në jug të ven­dit. Numri i komunave ende nuk është i përcaktuar dhe burime nga Komisioni i Reformës për DITA thanë se do të jenë ditët në vijim që do të japin numrin e saktë të njësive të tjera vendore.

Nga bashkitë sen­sitive për të cilat ka patur komente dhe që nuk ka ndryshuar as në vari­antin përfundimtar është Himara, e cila mbetet e bashkuar me Lumin e Vlorës. Kjo mund të sjellë votën kundër të aleates qeveritare, PBD­NJ-se dhe sot në mesditë kryetari i saj Vangjel Dule ka lajmëruar një konferencë shtypi.

Kryetari socialist i komisionit Bashkim Fino tha se kërkesa e demokratëve për ta nisur nga de­centralizimi është e parealizueshme dhe se kjo reformë do të ndodhë me nisjen e sesionit të ri parlamentar në shtator.

Miratimi i hartës së re territo­riale deri në fund te korrikut do të thotë se zgjedhjet lokale vitin tjetër do të bëhen në 61 bashkitë e reja. Pas kësaj edhe Partia Demokra­tike do të duhet të sqarojë nëse do të marrë apo jo pjesë në zgjedhjet lokale. Kjo hartë do t’i kalojë për mendim Këshillit të Ministrave dhe më tej për miratimin përfundimtar me ligj Kuvendit.

Bashkitë që i shtohen variantit të mëparshëm janë si më poshtë:

• Qarkut të Shkodrës i shtohet bashkia e Fushë-Arrëz
• Dibrës i shtohet Bashkia e Klosit
• Tiranës i shtohet bashkia e Vorës dhe ajo e Rrogozhinës
• Elbasanit i shtohet bashkia Belsh dhe Përrenjasi
• Beratit i shtohet Bashkia Ura Vajgurore dhe Poliçani
• Vlorës i shtohet bashkia e Selenicës dhe Konispoli
• Gjiorokastrës i shtohet Bashkia Libohovë, Memaliaj dhe e Këlcyrës
• Fierit i shtohet bashkia e Roskovecit