Një vendim i Shoqatës së Transporteve për grevë 24 orëshe është zbatuar dje në Tiranë. Kjo Shoqatë kërkon rritjen e çmimit të biletës.

Ata që e kanë vuajtur më shumë mungesën e autobusëve, kanë qenë qytetarët e thjeshtë, të cilët nuk kanë mundësi për të zgjidhur privatisht lëvizjen. Por nëpër stacione ka pasur edhe qytetarë që nuk ishin të informuar për grevën, dhe prisnin autobusët. Shoqëritë e Transportit, thonë se janë në pritje të një përgjigjeje nga Ministria e Transporteve dhe Bashkia e Tiranës.

Rritjen e çmimit të biletës, ata e justifikojnë me rritjen sipas tyre, “të papërballueshme të kostove, për shkak dhe rritjes së çmimit të karburantit, si edhe kredive të marra nëpër banka për blerjen e autobusëve të rinj”. “Rreth 80 për qind e parave janë marrë nga bankat, sepse nuk kemi pasur mundësi që të realizonim vetë investimin që kemi bërë. Situata e krijuar na e ka vështirësuar punën. Detyrimet tona bankare rriten, të gjitha këto na kanë detyruar që këto dy vitet e fundit neve të dalim me humbje”, thotë Ferdinand Ibrahimi, president i Shoqatës së Transportit. Sipas tij gjendja e tyre financiare nuk u lejon që të vazhdojnë më tej, madje as të paguajnë pagat e punonjësve. Ditët e fundit, ka pasur një polemikë mes bashkisë dhe qeverisë, në lidhje me çështjen e transportit urban në kryeqytet që quhet publik, por privati bën ligjin. Dy ditë më parë në Kuvend, Rama tha se kompetenca për këtë çështje do t’i kalojë pushtetit vendor.

Takim për furgonat, zgjohen “sindikalistët”

Në një takim me përfaqësues të shoqatave të transportit ndërqytetas dhe atyre të autoveturave 8 plus 1, ministri i Brendshëm Saimir Tahiri tha se vendimi për ndalimin e furgonëve të palicencuar është një masë e domosdoshme për sigurinë e qytetarëve. Ministri i Transportit, Edmond Haxhinasto, kërkoi nga automjetet e licencuara, të sigurojnë të gjitha kushtet për udhëtimin e qytetarëve deri tek pajisja me taksimetër.

Por shoqatat e Autobusëve denoncuan  dhënien e licencave pa kriter nga ana e pushtetit vendor. Në takim nuk munguan edhe tonet e ashpra kur u kërkua rishikimi i ligjit për kthimin bosh të automjeteve. Ajo që ra në sy gjatë takimit ishte fakti se disa “përfaqësues të sindikatave”, të cilat kanë qenë plotësisht pasiv vitet e fundit, ishin shumë aktiv kesaj here. Një prej tyre ishte dhe Gëzim Kalaja, i cili për vite të tëra para 23 qershorit nuk doli në asnjë  protestë si drejtues sindikate.

Haxhinasto dhe Tahiri: Çështja e transportit publik po politizohet

Ministri i Transportit dhe Infrastrukturës, Edmond Haxhinasto, dhe ministri i Brendshëm, Saimir Tahiri, janë takuar dje me përfaqësues të grupeve të interesit të transportit ndërqytetas dhe rreth qytetas të pasagjerëve si dhe atyre të furgonave 8+1. Haxhinasto tha se çështja e transportit publik po politizohet për përfitime elektorale.

“Kjo qeveri ka një objektiv madhor, u shërbejmë qytetarëve sipas standardit evropian.  Ka një sistem i tërë ligjor, që nuk respektohet prej të gjithëve, pasi gjykohet i papërshtatshëm. Ligji që rregullon çështjet e transportit ligjor ju e dini shumë mirë cili është, ai është bibla e transportit rrugor. Ndodh që nga mungesa e një kërkese llogarie, tregu prishet. Nuk zbatohen kërkesat e tij për licencimet e subjekteve për kategori të ndryshme transporti, taksi, rreth qytetas dhe ndërqytetas. Ky problem fatkeqësisht ka filluar te politizohet, pasi mendohet se duke marrë krahun e një grupi interesi po fitojnë ndonjë votë. Kjo nuk është e drejtë se kostoja është për qytetarët dhe jo për ata që udhëtojnë me mercedez të tipit të fundit”, tha Haxhinasto.

Ai shtoi se shërbimi i transportit ndërqytetas do të bëhet me autobus të cilët do të kenë një kohë të caktuar, me komoditetin përkatës, me garancinë e duhur të shërbimit, me cilësinë përkatëse të mjetit dhe të shoferit, me bileteri me tabelën e orareve siç e kanë edhe vendet e tjera europiane.

“Duam t’u garantojmë shqiptarëve një shërbim të denjë siç e meritojnë. Ka mënyra të ndryshme për furgonët. Ka transport rreth qytetas që mund të ofrohet një shërbim i tillë. Ka zona që nuk mund të futen autobusë që mund të përdoren furgonat por edhe këto duhet të plotësojnë kriteret përkatëse sa i përket automjetit por edhe cilësisë së shoferit. Kemi mirëkuptimin e plotë të grupeve të interesit por nuk biem dakord për kompromentohet cilësia e shërbimit të qytetarëve” shtoi Haxhinasto.

Ndërsa ministri i Brendshëm, Saimir Tahiri, u shpreh se siguria e qytetarëve nuk do të negociohet asnjëherë. “Kjo çështje duhet zhveshur nga politizimi. Siguria në këtë rast nuk negociohet me askënd. Modeli negociohet ndërsa siguria jo. Askush nuk mund të vërë në diskutim jetën e qytetarëve shqiptarë”, tha Tahiri.