Dy persona janë arrestuar dje si autorë të zjarrëvënies në Burgun e Rrogozhinës rreth dy muaj më parë. Sipas policisë, bëhet me dije se në pranga kanë përfunduar Ledjon Gjika dhe Jurgen Meçalliu.
Ledjon Gjika është 23 vjeç dhe banon në Libofsh në Fier, ndërsa Jurgen Meçalliu është 20 vjeç dhe banon po në Fier. Sipas policisë, dy të sipërpërmendurit dyshohet se kanë vënë zjarrin në burgun e Rrogozhinës, ngjarje e ndodhur më 31 janar të këtij viti. Nga zjarri në burg u asfiksuan 21 të dënuar dhe që atëherë policia shpalli nën hetim dy të paraburgosurit Ledion Gjika, i akuzuar për vjedhje dhe Jurgen Meçalliu, i cili ndodhej nën masën arrest me burg për armëmbajtje pa leje. Policia dhe SHKB kishin dy emrat e të dyshuarve nën hetim, por së fundmi prokuroria ka provuar se dy të rinjtë, në shenjë pakënaqësie që po qëndronin në qeli, por edhe si lojë, kanë ndezur me çakmak teshat dhe më pas jorganët e qelisë, duke i vënë zjarrin pjesës më të madhe në burg. Për fat të mirë nuk pati asnjë viktimë si pasojë e incidentit.