Zlatan Ibrahimoviç beson se këtë vit ka rastin më të mirë për ta fituar Ligën e Kampionëve. 32-vjeçari i Paris Saint-Germainit, ka fituar kampionatet me të gjitha klubet ku ka luajtur, mirëpo, asnjëherë nuk e ka pasur fatin ta fitojë garën më të madhe evropiane për klube, Ligën e Kampionëve. Këtë edicion, PSG luan kundër Chelseat në çerekfinale dhe suedezi shpreson që klubi i tij të kualifikohet në fazat e mëtutjeshme dhe madje ta fitojë Ligën e Kampionëve. “Mendoj se mundësia ime e fundit për ta fituar Ligën e Kampionëve është me Parisin, pasi që kjo është kontrata ime e fundit në Evropë”. “Jemi në çerekfinale dhe luajmë ndaj një skuadre të shkëlqyer. Nuk kemi asgjë për të humbur dhe jemi relativisht të rinj në këtë garë, ndërkohë që Chelsea ka së paku dhjetë vite përvojë”, u ka thënë Ibra gazetarëve. Përballja e parë çerekfinale ndërmjet PSG dhe Chelseat zhvillohet të mërkurën mbrëma në Parc de Princes. I.K