Policia greke ka publikuar fotot dhe emrat e shqiptarëve të arratisur pas sulmit që iu bë burgut të Trikalas mbrëmjen e së premtes, ku mbetën të plagosur dy prej rojeve që ndodheshin në kullën vrojtuese
Policia greke publikoi fotot dhe emrat e 8 shqiptarëve të arratisur të premten në mbrëmje nga burgu i Trikalas në Greqi. Ata janë: Flaulant Luli, Edison Lika, Ilir Kupa, Marjan Kola, Klement Cala, Admir Murataj, Ermal Lita dhe Fatos Sulaj.
Burgu i Trikalasë në Greqi u bë të premten mbrëma skenë trazirash, pasi një grup i armatosur, i mbërritur me një automjet në afërsi të ndërtesës plagosi dy roje. Ndërkohë, 11 të burgosur arritën të arratiseshin. Disa minuta pas arratisjes, autoritetet e burgut nuk arrinin të jepnin shifrën e saktë të të arratisurve dhe vetëm pas numërimit të të dënuarve që ishin ende aty u tha se të larguarit ishin 11. Sipas informacionit të dhënë nga policia, kanë qenë të paktën 10 persona të armatosur me kallashnikovë dhe granata, të cilët kanë sulmuar burgun nga jashtë, duke e zhvendosur vëmendjen e gardianëve nga të dënuarit. 400 gëzhoja kallashnikovi u gjetën në vendngjarje, 6 kratere të shpërthimit të granatave dhe 2 granata të pashpërthyera. Vetëm në një nga këndet e burgut ku ishte qëlluar, u gjetën shenjat e 74 plumbave. Ndërkohë, të shtëna ka pasur edhe brenda burgut.
Kanë qenë pikërisht rojet e kullës vrojtuese ata të cilët u bënë shënjestër e sulmit. Dy oficerët, 30 dhe 40 vjeç, u plagosën rëndë.