Insinuata djallëzore për ndarjen veri-jug

Deklarata e djeshme e kreut të grupit parlamentar të PD-së, Edi Paloka, nuk është një deklaratë në erë dhe sidomos nuk duhet konsideruar si një deklaratë e zakonshme që vjen nga selia blu. Ai tha as më shumë e as më pak se me këtë ndarje po shkojmë drejt një përplasje të rrezikshme krahinore. Insinuatë më të rrezikshme dhe më të frikshme nuk mund të ketë. Të thuash se me ndarjen e re territoriale janë diskriminuar veriorët, do të thotë të mos kesh sytë në ballë, por t’i frysh një konflikti që realisht nuk ekziston, tejet dashakeqës midis veriut dhe jugut të vendit. Që ndarja e re territoriale nuk është e përkryer dhe që ka shumë pakënaqësi kjo dihet. Sidomos në qarqet e jugut të vendit ka pasur edhe protesta kundër kësaj ndarjeje, pse është bashkuar ky fshat me atë tjetrin, pse është fshirë kjo bashki dhe është krijuar ajo tjetra etj. Por që të mendosh dhe, për më tepër, të shprehësh dyshimin se kjo ndarje po diskriminon një pjesë të vendit kundër tjetrës, veriun në favor të jugut dhe sidomos të bësh dhe insinuata për përplasje të mundshme midis veriut dhe jugut, kjo është më shumë se djallëzore. Kjo është kriminale, pasi kërkon të injektojë përçarjen dhe vëllavrasjen mes shqiptarëve. Dhe këtë Edi Paloka nuk e bën në emrin e tij vetjak, por të partisë më të madhe të opozitës. Fatmirësisht, shqiptarët i kanë sytë në ballë dhe mendjen në kokë për t’i hedhur në kosh deklarata të tilla të papërgjegjshme. Ato, as më shumë e as më pak janë antishqiptare dhe antikombëtare.

Sa për kujtesë të zotit Paloka dhe të demokratëve të tjerë që mendojnë si ai, po i kujtojmë se një njeri dikur mendoi dhe frymëzoi konfliktin midis veriut dhe jugut të vendit. Ky njeri atëherë ishte president i vendit dhe quhej Sali Berisha. Kjo ka ndodhur në vitet 1996-1997 dhe për këtë janë publikuar dokumente të urdhëresave që ish presidenti ka dhënë me këtë rast. Shqipëria u ndez flakë nga jugu në veri për shkak të qeverisjes së mbrapshtë të këtij njeriu, por nuk u përfshi në konfliktin e rrezikshëm krahinor, sikurse ëndërronte njeriu me emrin Sali. Më 1997 pati vetëm një konflikt ku u përfshinë dy palë: populli nga njëra anë që nga Saranda, Vlora, Shkodra e Tropoja në njërën anë dhe bandat me pushtet të Berishës në anën tjetër. E kur nuk ndezi atëherë ky konflikt, si mund të ndezë sot për një reformë të domosdoshme të ndarjes së re territoriale të vendit. Me deklarata të tipit Paloka shqiptarët mund të venë buzën në gaz, pasi e dinë fare mirë nga e kanë burimin dhe kush e nxit këtë ndarje midis veriut dhe jugut. Paloka është thjesht një megafon në këtë rast.