Japonia e ka vendosur ushtrinë në gjendje alarmi gjatë kësaj të hëne, teksa i druhet një testimi të ri të raketave balistike nga ana e Koresë së Veriut, ndërkohë që edhe Korea e Jugut ka njoftuar se ka prova të qarta të përgatitjeve për lëshim.
Tensionet në rajon kanë qenë të forta që kur Veriu komunist zhvilloi testin e katërt bërthamor në janar, veprim që e pasoi me lëshimin e një sateliti dhe lëshimin testues të disa raketave me rreze të ndryshme.
Japonia urdhëroi anijet gjuajtëse dhe bateritë raketore antibalistike “Patriot” të jenë në gjendje gatishmërie të lartë dhe të rrëzojnë çdo lloj predhe që mund të jetë me drejtim nga vendi ishullor, sipas asaj që bën të ditur rrjeti shtetëror televiziv “NHK”.
Një zyrtarjaponez, i cili refuzoi të identifikohej pasi nuk është i autorizuar të flasë për mediet, konfirmoi udhrin për të vepruar, ndërsa edhe një zëdhënës i Ministrisë japoneze të Mbrojtjes nuk deshi të komentonte.
Njëra prej baterive antiraketore “Patriot” që është në perimetrin e Ministrisë së Mbrojtjes i kishte tytat e saj në pozicione qitjeje. Zyrtari koreanojugor i Mbrojtjes nuk dha as informacione mbi llojin e raketës që mund t’i drejtohet Japonisë prej Veriut, por agjencia shtetërore e lajmeve “Yonhap” bëri të ditur se gjasat janë që të jetë i rrezes së mesme dhe i llojit “Musudan”.
“Kemi kapur sinjale dhe po gjurmojmë çdo lëvizje. Jemi tërësisht të përgatitur”, tha një zyrtar koreanojugor, gjithashtu në kushte anonimiteti.
Koreja e Veriut është përpjekur tri herë, po pa sukses, të lëshojë raketa “Musudan” gjatë muajit prill, të paktën nga ç’bëjnë të ditur zyrtarë amerikanë dhe koreanojugorë.
Japonia i ka vendosur forcat e saj antiraketore në gjendje alarmi të paktën dy herë gjatë këtij viti, pasi ka kapur të dhëna të mjaftueshme për lëshime raketash nga Veriu komunist.