Harry Kane i Tottenham Hotspur është numri nëntë i ri të cilin Real Madridi dëshiron ta sjellë në skuadër sezonin e ardhshëm. Transferimi i tij do ta thyente rekordin aktual në tregun e transferimeve dhe do ta vendoste një rekord vështirë të thyeshëm në të ardhmen, bazuar në shumën që Tottenham e kërkon për të.
Kane do t’i mbushë 26 vjet në fund të muajit korrik dhe sipas mediave botërore, bazuar në moshën dhe paraqitjet e tij, anglezi do të ishte sulmuesi më i mirë që një skuadër mund ta blejë, sidomos nëse e krahason me sulmuesit e mëdhenj por në moshë, Robert Lewandowskin (30 vjeç) dhe Edinson Cavanin (32 vjeç), transmeton Gazeta Express.
E përditshmja spanjolle “AS” ka zbuluar se Madridi e ka kontaktuar klubin londinez për ta bërë këtë ëndërr realitet. Sipas AS, një zyrtar i lartë i Real Madridit ka biseduar me drejtuesit e Tottenhamit para Krishtlindjes për transferimin e mundshëm të Kane.
Synimi i tij ka qenë të mësojë se çfarë çmimi do të mundë të kishte blerja e tij, sa për t’i nisur bisedimet në muajt e ardhshëm. Përgjigja që ai ka marrë nuk ishte inkurajuese, 350 milionë euro.
Në çmendurinë e tregut të transferimeve që nisi me kalimin e Neymarit në Paris Saint-Germain nga Barcelona më 2017 për 222 milionë euro, ky vlerësim pasqyron nevojën e Madridit për ta mbushur boshllëkun e lënë nga largimi i Cristiano Ronaldos, njeriun i cili ia siguronte 50 gola në sezon para se t’i bashkohej Juventusit.
v.l/ Dita