Katovica që ripjell vetveten

Në shkrimin e tij në gazetën “Dita”, dt 21 tetor 2013, Bedri Islami, një nga gazetarët e dëgjuar të  shtypit tonë të para viteve 90-të, një nga njohësit më të mirë të situatës politike në hapesirën gjithëshqiptare edhe pas këtyre viteve, flet për rrezikun e një Katovice të Re. Ai shkruan se ”…e gjithë kjo (diskutimi në se ka patur ose jo një takim në Katovicë,në vitin 1987 dhe orientimet e këtij takimi), tash, pas njëzet e ca viteve, do e kishte humbur rëndësinë e saj, në se  nuk do të ndodheshim para një Katovice të Re, e cila, qofsha i gabuar, mund të jetë më e rrezikshme se e para. Kjo Katovicë e Re mund të përmblidhet shkurt me pyetjen, kush e solli Lulzim Bashen në politikën shqiptare, cila Katovicë e Re u bë shkaku i kësaj ardhje, cila marrëveshje pret të zbulohet, cila enigmë fshihet pas saj”. Deklarim sa i beftë, drithërues por edhe plot kërshëri për t`u marrë në konsideratë.

Pra diskutimi, nëse është apo nuk është i vërtetë takimi i Katovicës së  Vjeter, i vitit të largët 1987, për  pasojat negative që  në zhvillimin e Shqipërisë në këto 25 vite, tashmë nuk  ka shumë vlerë. Kjo është një e kaluar e pakthyeshme për vendin tonë. Ajo që ishte për t`u bërë  është bërë. Katovicën, nëse është e vërtetë, e vuajti më së shumti populli shqiptar, madje edhe anëtarësia e gjerë e PPSH, që presupozohej se do të favorizohej, ndërsa e gëzoi një kategori njerëzish që ishin afër udhëheqjes kryesore të partisë, që shumë shpejt e shpallën veten “opozitarë” me të. Edhe përgjegjësia e Sali Berishës dhe e Fatos Nanos, të përgojuar më së shumti, si dy “katovicarët” e zgjedhur  nga Ramiz Alia është  e pakthyeshme. Madje duket sikur këtyre  të dyve  u pëlqen  të dalin si “zbatues” të thjeshtë  të  programit të Gorbaçovit shqiptar, Ramiz Alisë, se kështu edhe barrën për keqqeverisjen e këtyre viteve  i`a  lënë atij. Por edhe ne nuk ka pse të merremi më me Katovicën e Vjetër. Le t`ua lëmë  përgjegjësinë për të  në daçi Ramiz Alisë, si ideator, në daçi Saliut e Fatosit si “zbatuesit” e ideve të tij.

Tani  n`a duhet, urgjentisht, të merremi me Katovicën e Re. Nuk duhet lejuar që ajo të n`a sjellë po ato dëme që n`a solli e “vjetra”. A do t`a zbulojmë dot cilat janë orientimet e Katovicës së Re, që i bie, tashmë, të jetë shqiptare, jo polake. Duhet të zbulojmë se cili është, tashmë, Gorbaçovi, cili është Ramizi. Sipas mendjes sime i bie të jetë Sali Berisha, sepse Luli është beniamini i tij dhe ka ardhur në majën e pushtetit politik,në drejtim të PD, që heret a vonë, do të rivijë në pushtet, me bekimin e tij. Aq më keq në se është  ndonje,që ne shpesh n`a shkon në mendje,nga qarqet antishqiptare.  Duhet të zbulojmë  se cili është program i këtij “katovicari” të Ri, Lulit, Sipas mendimit tim është  të mbrojë e të çojë më përpara “arritjet” e PD, por jo të PD si parti politike, por të PD si aset i Sali Berishës,të mbrojë e të zhvillojë “arritje”e familjes. Po nuk u bë e mundur zbulimi e demaskimi i një “programi” të tillë, zbulimi e demaskimi i “katovicarëve” të rinj, vendin tone  e pret një fat edhe më i keq se sa gjatë këtyre viteve që kaluam. Këtë zbulim nuk mund t`a bëjnë politikanët, partitë politike sepse  në sferën politike ka shumë “katovicarë”. Këtë n`a e ka provuar përvoja e këtyre viteve. Zbulimim dhe demaskimin e një Katovice të re  e bën më mirë    opinioni publik, e  bën shtypi, e  bëjnë gazetarët e guximshëm investigativë, e  bëjnë organet e medies së  guximshme. Mos n`a lini të n`a tërheqin zvarrë edhe për vite e dhjetra vite të tjera “katovicarë” me prirje antikombëtare.

Letër e nënshkruar

Gani Elezi