Këngëtarët kosovarë braktisin televizionin “Klan”: Ftoi serbin Zdravko Çoliç

Një valë reagimesh ka shpërthyer këto ditë në media për sa i përket pjesëmarrjes së këngëtarit serb Zdravko Çoliç në spektaklin e televizionit Klan, “Kënga ime”. Deri më tani, tri këngëtar kosovarë që ishin planifikuar të merrnin pjesë në garën e këngës popullore qytetare kanë hequr dorë, dhe ata janë,  Visar Peja, Hysni Klinaku dhe Ramadan Krasniqi. Ky i fundit ka reaguar nëpërmjet një deklarate të cilën e quan, “Deklaratë për opinionin mbarëkombëtar”. Sipas Ramadan Krasniqit, “nëse muzika nuk ka gjuhë, ose është gjuhë unikale botërore, Zdravko Çoliç e asnjë artist tjetër serb deri sot, nuk patën guximin njerëzor, të paktën të kërkonin falje për krimet që shteti i tyre i ka bërë në Kosovë”.

Këngëtari Ramadan Krasniqi i njohur si Dani, nëpërmjet një komunikate ka rikonfirmuar qëndrimin e së dielës, për anulim të pjesëmarrjes së tij në spektaklin “Kënga ime” në Shqipëri. Dani ka bërë të ditur se shkak i këtij vendimi, është pjesëmarrja në këtë skenë, gjatë fundjavës së shkuar, e këngëtarit serb, Zdravko Çoliç.

“Duke ruajtur respektin profesional për të gjithë bashkëpunëtorët e mi në Tiranë, nga të cilët kisha nderin të përfaqësojë Kosovën në këtë program edhe në vitin 2010, unë sot ndjehem thellë i prekur nga hapësira që iu nda Çoliçit, nga ana e organizatorit”, ka thënë këngëtari Ramadan Krasniqi.

Megjithatë, duke shpresuar se ka qenë një gabim pa dashje nga ana e organizatorit, ka shtuar se nuk e sheh vetën në një skenë të Tiranës me Zdravko Çoliç.

“Zdravko Çoliç dhe unë njihemi mirë në profesion. Ja kemi përcjellë karrierën njëri-tjetrit. Nuk do të më pengonte aspak që t’a konkurroja Zdravkon, në ndonjë festival ndërkombëtar, ku Kosova ende nuk pranohet si pasojë e shtetit të tij serb. Muzika nuk ka gjuhë, ose është gjuhë unikale botërore, dhe aty flet arti, por unë mbetem i bindur thellë se hitet e Zdravko Çoliç që i takojnë viteve të 70-ta, 80-ta dhe 90-ta, tashmë kanë vdekur, e bashkë me to edhe Jugosllavia. Andaj ftesa që i bëhet atij pos që është e hershme, është edhe shumë e panevojshme”, ka vlerësuar Dani.

Tërhiqet Hysni Klinaku: Kam 1000 e një arsye të mos ngjitem në një skenë me Çoliçin

Këngëtari, Hysni Klinaku ishte i pari që u tërhoq nga  Festivali ”Kënga ime”, prodhim i Tv Klan. Nëpërmjet rrjetit “Facebook”, Klinaku ka bërë të ditur arsyet e tërheqjes nga ky festival. “Përshëndetje miq të dashur. Jam njëri ndër këngëtarët pjesëmarrës të Festivalit “Kënga ime” në Tv Klan. Pas prezantimit të këngëtarit serb, Zdravko Çoliç si mysafir special në javën e kaluar, unë kam vendosur të mos jem pjesë e këtij Festivali të këngës shqiptare. Pse s’dua te jem në skenën e këngës shqiptare bashkë me Çoliçin i kam 1000 e një arsye”, shkruan këngëtari Hysni Klinaku në rrjetin social.

Edhe Visar Peja tërhiqet nga “Kënga ime”

Organizatorët nuk kanë lidhje me përjetimet e popullit të Kosovës

Këngëtari Visar Peja ka marr vendim që të mos jetë pjesë e festivalit “Kënga ime” në Tv Klan si pasojë e pjesëmarrjes së Zdravko Çoliç. Ai e ka konfirmuar këtë vendim në mediat kosovare dhe, sipas tij, organizatorët e këtij festivali treguan se nuk kanë lidhje me përjetimet e popullit të Kosovës. “Sigurisht që nuk do të jem pjesë e këtij festivali. Atë çfarë bënë definitivisht treguan që nuk kanë lidhje me përjetimet tona. Kur në Rashkë të Serbisë akoma po nxirren eshtrat e shqiptarëve, ata ftojnë një këngëtar serb të jetë pjesë e këtij festivali. Po le të ju mbetet në përgjegjësi dhe fytyrë të tyre”, ka thënë këngëtari.  Peja më pas është shprehur se akoma nuk e kupton pse do të duhej të ftohej një këngëtar serb në një festival të muzikës ku prezantohen vlerat e muzikës shqiptare, dhe, sipas tij, nëse veç e donë aq shumë, atëherë le ta organizojnë një koncert në stadium, por jo në nivel institucionesh.

Reagon Vedat Ademi, kritikon “Kënga ime”

I qejf mbetur nga ftesa dhe pjesëmarrja e këngëtarit serb në Tiranë është edhe këngëtari Vedat Ademi, i cili ka kritikuar organizatorët e festivalit “Kënga ime” për ftesën speciale që i kanë bërë Zdravko Çoliç.  “Nuk më ka pëlqyer ideja që e kanë ftuar këngëtarin Zdravko Çoliç. Është dashur të merret mësim nga vizita në Shqipëri e Goran Bregoviçit, ku pati shumë njerëz që ishin kundër asaj vizite, prandaj nuk është dashur të bëhet ky provokim përsëri.” Duke i dal në mbështetje kolegëve të tij kosovar ai ka shtuar:  “Nuk duhet t’u jepen mundësi këngëtarëve serbë të marrin pjesë në emisione të tilla, ka mjaft artistë që mund ta përfaqësojnë muzikën tonë, qoftë nga Kosova, Shqipëria, Maqedonia apo Mali i Zi”, ka thënë Vedati në emisionin “Prite të Gjelbrën” në “Radio 21”.

Deklarata në Klan: Unë çdo gjë e dua, përjashto nacionalizmin

Zdravko Çoliç: Shqiptarët më pritën si mbret, ndjeva dashuri në çdo hap

Paraqitja e këngëtarit serb Zdravko Çoliç të shtunën e kaluar para publikut shqiptar Tiranë është komentuar edhe në shtypin serb. Sipas “Vecernje Novosti”, Çoliç është pritur në Shqipëri sikur një mbret. Bëhet e ditur se Çoliç atje ka takuar edhe ish -Presidentin Bamir Topi. Ndërsa tani po bëhen përgatitjet edhe për koncertet që do t’i mbajë gjatë verës, një në Tiranë e një ndoshta edhe në Shkodër. Prezantimi i këngëtarit të njohur serb Zdravko Çoliç në Tiranë është pasqyruar edhe në mediat serbe. Sipas tyre Çoliç është pritur atje si një mbret ndërsa Çoliç ka treguar se në Shqipëri ka qenë edhe më parë por jo në Tiranë. Sipas tij, organizatorët do të merren edhe me përgatitjen e koncertit që ende nuk është vendosur se ku do të mbahet. Madje Çoliç ka thënë se ai do të mund të këndojë edhe në Shkodër, ku gjatë qëndrimit të tij në Shqipëri edhe ka drekuar. “Kam qenë në Shqipëri edhe më herët, por kurrë në Tiranë, që është një qytet shumë i bukur: ka thënë Colic për Novosti. “Kanë rini të mrekullueshme dhe jam pritur si mbret. Kam ndjerë dashurin në çdo hap. Kam dhënë intervistë për televizionin më të shikuar të tyre. Nuk e kemi përmendur politikën. Kam marrë pjesë në “X Faktor” ku kanë garuar 7 këngëtarë nga Shqipëria, Kosova dhe Maqedonia” ka treguar Çoliç. Sido që të jetë paraqitja e Çoliç në Tiranë ka nxitur shumë reagime në Kosovë, sidomos në rrjetet sociale. Madje një këngëtar kosovar që ka qenë i ftuar nga Klan ka anuluar pjesëmarrjen. Më poshtë, intervista që këngëtari ka dhënë për drejtuesin e programit, Pandi Laço.

Jeni ende në orët e para të një kontakti me një vend të panjohur, gjithsesi një ide të përgjithshme besoj e keni krijuar…

Unë jam shumë i lumtur që jam këtu edhe gjatë socializmit gjithmonë kam dashur të vij në Shqipëri, veçanërisht në Tiranë si kryeqytet, mirëpo nuk kanë qenë mundësitë. Ishte ftesa për të marrë pjesë në programin tuaj mundësia e parë për të ardhur këtu dhe unë nuk mund ta refuzoja.

Cilët janë shqiptarët për Zdravko Čolić?

Shqiptarët janë shumë njerëz të mirë, të dashur, shokë të mirë, kam kujtime të mira prej tyre si njerëz të shkëlqyer. Ajo që është më e rëndësishme është se unë kudo udhëtoj nëpër botë kam plot miq shqiptarë, si artistë, sportistë etj dhe në çdo takim kam  kënaqësi që rri me ta dhe që i njoh prej shumë vjetësh.

Dhe cili është Zdravko Čolić për shqiptarët?

Nuk e di, nuk kam pasur asnjë ide nëse në Shqipëri më njohin ose jo, muzikën dhe punën time gjithashtu, në këto 40 vjet. Mirëpo jam totalisht i befasuar nga interesimi i përgjithshëm në Shqipëri, Kosovë, Maqedoni. Kam paramenduar se Shqiptarët e dëgjojnë muzikën time dhe tani jam shumë i lumtur që pas kaq shumë vitesh po shoh që kënga ime është aq shumë e njohur këtu.

E njihni ndopak muzikën shqiptare, si ritme si mode?

Kam parë disa koncerte e festivale të vendit tuaj dhe më vjen se ritmika e melosi janë pothuajse të ngjashme në gjithë Ballkanin dhe shumë prej tyre janë përdorur si ornament në shumë këngë të mijat më të hershme. Prej njerëzve që kam njohur kujtoj Gazmend Pallaskën, me të cilin kemi qenë në disa festivale bashkë. Ndërsa prej më të rinjve yllin botëror  Rita Ora. Muzika juaj etnike si linjë dhe si sound më vjen shpesh parasysh si një vlerë e padiskutueshme dhe e bukur që mund të përdoret shumë bukur. Ne jemi të gjithë të njëjtë edhe me zakonet, kuzhinën, mikpritjen. Unë çdo gjë e dua, përjashto nacionalizmin, sepse i takoj një botë tjetër, asaj të artit dhe dëshiroj që mes nesh të ekzistojnë vetëm gëzimi, mirëkuptimi dhe takimet e ndërsjella, që duhet të jetë e ardhmja e gjithë rajonit tonë.