Kosovrasti nuk njeh shkarkimin nga shumica: Grumbullim i paligjshëm

I shkarkuar dje me votat e shumicës së këshilltarëve nga posti i kryetarit të Këshillit Bashkiak, Njazi Kosovrasti thotë se mbledhja e djeshme ishte “një grumbullim i paligjshëm qytetarësh”. Kosovrasti thotë se vendimi për shkarkimin e tij është thjesht një deklaratë e këshilltarëve.

Në deklaratën e tij, Kosovrasti është paksa kontradiktor, pasi këshilltarët e majtë i cilëson njëherë qytetarë të thjeshtë, kur flet për mbledhjen, ndërsa kur flet për vendimin e shkarkimit i njeh si këshilltarë.

“Jo që s’bëhet fjalë për mbledhje të këshillit bashkiak, por në vlerësimin tim juridik ai ishte një grumbullim i paligjshëm qytetarësh. Nuk është fjala për vendim, është një deklaratë e këshilltarëve. Nuk e kuptoj pse u mblodhën aty. Le të mblidheshin te PS të bënin atë deklaratë që bënë dhe ta firmosnin”, tha Kosovrasti për mediat sot në mesditë.

Këshilli Bashkiak mblidhet në paradhomë, shkarkohet Njazi Kosovrasti, kryetari i ri Aldrin Dalipi

3 maj – Pavarësisht se administrata e bashkisë mbylli sallën ku zhvillohen mbledhjet e Këshillit Bashkiak, mbledhja e ditës së sotme është zhvilluar. Pas 3 orë pritjeje, gjatë të cilës u kërkua hapja e sallës, këshilltarët e majtë (PS-LSI) kanë mbajtur mbledhjen e radhës në paradhomën e sallës së madhe. Mbledhja ka nisur me pikën e parë të rendit të ditës: shkarkimin e kreut të Këshillit Bashkiak, Njazi Kosovrasti. E majta, e cila përbën shumicën në këshill, ka miratuar me 31 vota shkarkimin e Kosovrastit.

Po me 31 vota është miratuar zgjedhja e Aldrin Dalipit në postin e kreut të Këshillit Bashkiak. Për shkak të mospranisë së këshilltarëve të djathtë në mbledhje, vendimi i shkarkimit të Kosovrastit dhe emërimit të Dalipit do t’i nisen për verifikim prefektit të Tiranës.

E majta kërkon mbledhjen e Këshillit Bashkiak, Dalipi-Bashës: Prano shumicën

Këshilltarët e PS dhe LSI në Bashkinë e Tiranës kanë firmosur një kërkesë drejtuar kryebashkiakut Basha, me anë së cilës kërkojnë hapjen e sallës ku zhvillohen mbledhjet e Këshillit Bashkiak. Kërkesa e të majtës, e cila është tashmë shumicë, bëhet me qëllim që të zhvillohet mbledhja e parashikuar për sot, ku do të kërkohet shkarkimi i Njazi Kosovrastit.
Por duke qenë se zyrat e Protokollit të Bashkisë janë mbyllur, këshilltarët mësohet se do ia dorëzojnë Bashës në dorë këtë kërkesë.

Ndërkohë, më herët kreu i këshilltarëve të majtë, Aldrin Dalipi, akuzoi kreun e Bashkisë, Basha për bllokim të mbledhjes së këshillit. “Të arrinte deri këtu Basha sa të ndërronte natën bravën e sallës së KB, të bllokonte telefonat e këshillit, të ndërronte pasuordin e kompjuterit të KB. Turp. Të bëjmë dhe njëherë thirrje ruaj qetësinë, pranoje shumicën mos e përjeto kaq me dhimbje këtë situatë. Ka një shumicë të re për qytetarët!”, shkruan Dalipi.

Shumica kërkon shkarkimin e Kosovrastit, bashkia i vë kyçin sallës së mbledhjeve të Këshillit Bashkiak

Ndryshohen gjatë natës bravat e Këshillit Bashkiak, me qëllim pengimin e mbledhjes që pritet të mbahet sot. Tre brava të sallës ku zhvillohen mbledhjet e Këshillit Bashkiak janë ndërruar gjatë natës, duke e bërë të pamundur futjen e këshilltarëve në sallë. Ndërkohë, nga burime pranë këshillit bashkiak mësohet se janë ndryshuar edhe paswordet e kompjuterave si dhe është bllokuar telefonia fikse dhe ajo celulare në të njëjtat ambiente.

Një veprim i tillë, në mos i njohur për këshilltarët e majtë, ka qenë i pritshëm. “Mos provoko këshilltarët e shumicës, je në sytë e medias, qytetarëve dhe partnerëve ndërkombëtarë. Mos u merr me fshehje vulash e mbyllje dyersh”, shkruante mbrëmë në Facebook kreu i këshilltarëve të majtë, Aldrin Dalipi.

Sot mblidhet Këshilli Bashkiak i Tiranës, ku këshilltarët e majtë pritet të kërkojnë shkarkimin e kryetarit Njazi Kosovrasti. Mbledhja është paralajmëruar të mbahet në orën 11:00 dhe pritet që në vend të Kosovrastit, këshilltarët e majtë (PS-LSI) të propozojnë Aldrin Dalipin.

Vetë Dalipi i ka bërë thirrje kryetarit të Bashkisë së Tiranës, Lulzim Basha, të mos tentojë bllokimin e mbledhjes.

Kalimi i LSI-së në koalicionin e majtë një muaj më parë i ndryshoi balancat në Këshillin Bashkiak të Tiranës, duke i dhënë shumicën të majtës. Ligjërisht, këshilltarët e majtë kanë kërkuar shkarkimin e kryetarit të këshillit, për të emëruar në vend të tij një përfaqësues të shumicës së re.