Këshilli Kombëtar i PD krahason Berishën me Enverin: Krijuan të dy një organizatë antiamerikane, vendimet e tij janë nul, nuk ka lidhje me partinë tonë

Me vota unanime është miratuar rezoluta e Këshillit Kombëtar të Partisë Demokratike në selinë e PD-së.

Anëtarët e pranishëm të Këshillit Kombëtar të PD, midis dy Kuvendeve, atë të Sali Berishës që u zhvillua ditën e djeshme dhe të Lulzim Bashës që pritet të mbahet më 18 dhjetor, kanë vendosur të mbështesin këtë të fundit.

Këshilli Kombëtar i PD-së e ka cilësuar si një tubim Kuvendin e Berishës ndërsa veprimet e tij i ka konsideruar nul, pa vlerë.

Në rezolutë konstatohet se tubimi i Berishës ka shkelur të gjitha normat e statutit të PD-së, ndërsa theksohet se u falsifikuan simbolet e logot e PD-së.

Pjesë nga rezoluta:

“Këshilli Kombëtar i PD vlerëson se lëvizja “Berisha” dhe tubimi i djeshëm si finalizim i saj janë një përpjekje për të deligjitimuar institucionet e Partisë Demokratike deri në shpërjen e saj si forca më properëndimore në vend, duke synuar shndërrimin e saj në një bunker për mbrojtjen e interesave personale të Sali Berishës përballë SHBA.

-Konkludon se çdo i ashtuquajtur qëndrim apo vendim i këtij tubimi është nul dhe nuk ka asnjë vlerë politike dhe ligjore për Partinë Demokratike.

-Afirmon se Kuvendi Kombëtar i datës 18 dhjetor është Kuvendi i vetëm i ligjshëm e gjithëpërfshirës i demokratëve, ku do të diskutohet, debatohet e vendoset në mënyrë demokratike për thellimin e demokracisë se brendshme dhe fuqizimin e PD-së përballë sfidave të kohës.

– Konsideron se duke instrumentalizuar disa problematika të brendshme të Partisë Demokratike, shqetësimet dhe ndjeshmëritë e sinqerta të mjaft demokratëve pas masakrës zgjedhore të 25 prillit, si dhe duke mobilizuar e mbedhur rreth vetes një grup organizatorësh me agjendë dhe interesa personale të së shkuarës dhe të sotmes, lëvizja “Berisha” për të shantazhuar Shtetet e Bashkuara të Amerikës, siç e deklaroi hapur në fjalën e tij, Sali Berisha hodhi dje bazat e një organizatë politike me frymëzim antiamerikan që vetëm me PD-në nuk ka e nuk do të ketë asnjë lidhje kurrë.

Kjo është lëvizja e parë antiamerikane në historinë e tri dekadave të sistemit demokratik dhe e dyta në historinë e Shqipërisë pas asaj të Enver Hoxhës.

-Partia Demokratike distancohet me forcë dhe dënon lëvizje të tilla që bien ndesh me përcaktimet identitare të saj, me interesat e demokratëve dhe të gjithë shqiptarëve, me marrëdhëniet strategjike jetike të Shqipërisë dhe Kombit shqiptar me SHBA…”

i.b. / dita