Kodheli: Autorët e 21 janarit do të shkojnë para drejtësisë

Deputetja socialiste, Mimi Kodheli, ka përgënjeshtruar sot shkrimin e publikuar në një të përditshme shqiptare, e cila citonte xhaxhanë e një prej viktimave të 21 janarit, që thoshte se pas aleancës me LSI, Rama nuk i është përgjigjur, ndërsa Kodheli i ka thënë  të hedhë pas krahëve të shkuarën. Kodheli tha se nuk ka komunikuar me xhaxhanë e Aleks Nikës, duke theksuar se “21 janari” do të marrë drejtësinë e merituar.

“Nuk kam folur, nuk e kam takuar dhe nuk kam komunikuar me xhaxhain e heroit të demokracisë, Aleks Nika. Me ardhjen e PS-së në pushtet, 21 janari do të gjykohet ashtu siç meriton. Të gjithë autorët e asaj masakre do të shkojnë para drejtësisë, ashtu siç e meritojnë, në respekt të dinjitetit të poshtëruar nga kjo qeveri. Do të jemi në anën e drejtësisë. Autorët nuk do t’i shpëtojnë gjykimit. Kjo është deklaratë e përsëritur nga PS”.

Kodheli u kërkoi mediave të jenë të kujdesshëm në informimin e popullatës në momente delikate si ditët e fundit. “Ju kërkoj që herë tjetër të jeni më të kujdesshëm dhe të mos dezinformoni në momente delikate si ky”, tha Kodheli.