Partizani është padyshim një ndër klubet më aktivë të merkatos. Largimi i trajnerit Duro dhe marrja e drejtimit nga Sulejman Starova është shoqëruar nga lëvizje të rëndësishme për organikën e skuadrës.
Rinovimi i Alban Hoxhës është një lajm i mirë, ndërkohë që largimi i Cuculit dhe lamtumira e Rrahmanit kushtëzojnë klubin që të nxitojë për të mbushur boshllëkun e krijuar në këndvështrimin e aventurës europiane.
Partizani rikthehet pas 7 vjetësh në kompeticionet kontinentale dhe synon që të bëjë një përfaqësim sa më dinjitoz në Europë ndaj në klubin e kuq kanë përveshur mëngët për të siguruar përforcimet e nevojshme.
Edhe pse ende mungon zyrtarizimi, pritet që shumë shpejt mesfushori i Apolonisë, Adeknule të prezantohet me fanellën e kuqe.
Afrimi i tij mund të konsiderohet një lëvizje e zgjuar në merkato pasi mesfushorit që u aktivizua me Apoloninë në sezonin e kaluar i ka përfunduar kontrata me klubin fierak ndaj dhe klubi mund të arrijë një akord të favorshëm.
Pas eksperiencës së suksesshme që pati në sezonin që sapo u mbyll me futbollistë të marrë nga Super Liga e Kosovës klubi duket i vendosur të vazhdojë këtë tendencë. Mediat kosovare njoftojnë se dy prej futbollistëve më të spikatur të kampionatit kosovar janë shumë pranë kalimit te të kuqtë. Bëhet fjalë për Arbër Prekazin dhe mesfushorin Mërgim Pefqeli.
Prekazi është një qendërmbrojtës që në fazën e dytë të sezonit në Kosovë luajti me Hajvalinë duke spikatur si një ndër më të mirët e kampionatit dhe konsiderohet si një alternativë ideale për të zëvendësuar Rrahmanin te Partizani.