Kosova-Veliajt: Nuk jam 99-sh, jam i ndershëm. Dua të pi një kafe me Ramën

Kandidati i djathtë për Bashkinë e Tiranës, Halim Kosova, gjatë prezantimit të programit për Tiranën, i ka kthyer përgjigje akuzave të rivalit të tij të majtë Erion Veliaj mbi ndërtimin pa leje të klinikës së tij në kryeqytet.

“Akuzat dhe shpifjet nuk duhen parë si model suksesi, – tha Kosova. – Unë nuk bëhem dot 99-sh, gjithçka e kam arritur me djersë dhe mund. Më kanë thënë je shumë i ndershëm për politikë. Unë nuk e kam zakon të merrem me kundërshtarin dhe as të zgjedh kundërshtarin, aq më keq t’i ofendoj ata”.

“Misioni im është më i rëndësishëm se programi, – vazhdoi Kosova. – Unë e kam bërë menaxherin këto vite më shumë se kush do. Përvoja ka treguar se menaxheri është një talent i lindur dhe nuk bëhet me urdhra, aq më shumë partiakë”.

Më pas Kosova tha se mezi pret të fillojë nga puna.

Ai ftoi edhe kryeministrin “për kafe” duke thënë se kërkon një vërejtje apo një sugjerim prej tij. Kosova tha se Rama i ka propozuar edhe një post shumë të nderuar.

“Dua të pi kafe me Ramën le të më bëjë një vërejtje te me japë ndonjë sugjerim. Ai ka qenë vlerësues maksimal i punës time. Ai ka bërë atë që s’e ka bërë njeri. Ai më ka propozuar për një nga postet më të nderuara që ka ky vend. Kam edhe një gjë që do t’ia them në kafe. Ai s’mund të kondicionojë votën e të gjithëve. E kam merak ta pi një kafe me të. Që t’ia them këtë gjë. Ai mund ta ketë mendësi ndarjen politike. Kur ta ketë mundësi ditën, natën në mëngjes, mua më ka në dispozicion me konditë që kafen ja jap unë. E fundit do tua them. Unë s’jam politikan tipik, por ndoshta për këtë keni nevojë”,-deklaroi Kosova.