Ukraina është në qendër të vëmendjes prej muajsh. Ajo çka filloi me protestat në masë u përshkallëzua në përplasje të dhunshme dhe në fund nga aneksimi i gadishullit të Krimesë nga Rusia. “BE duhet të kishte reaguar shumë më herët”, -thotë Pawel Kowal, kreu i delegacionit parlamentar BE-Ukrainë. Eurodeputeti polak i grupit konservator dhe reformist ECR, diskutoi situatën nëpërmjet një komunikimi online me personat e interesuar mbi situatën në Facebook.
Shumë prej tyre shfaqën shqetësimet e tyre mbi rolin rus në krizë dhe aneksimin prej saj të Krimesë. Kowal tha se masat tashmë të marra kundër Rusisë nuk ishin të mjaftueshme: “ Ne duhet të ndalojmë bashkëpunimin ushtarak me Rusinë dhe tregtinë e armëve gjithashtu”. Ai tha se, Putin po ndjek nga afër përgjigjen e BE-së për Krimenë: “Nëse reagimi është i dobët, Rusia do të bëjë një tjetër hap”.
Një sërë pyetjesh të tjera lidheshin me faktin se, si situata në Ukrainë do të prekë furnizimin energjetik në Europë, pasi shumë vende varen nga gazi rus. Kowal tha se, nuk shqetësohej në lidhje me një krizë të re energjetike:” Shtetet anëtare kanë mjaftueshëm gaz të depozituar dhe do të munden të importojnë gaz nga SHBA”. Gjithsesi, shtoi ai: “BE duhet të bëhet e pavarur nga gazi rus”.
Marrëveshja e Asocimit ndërmjet BE dhe Ukrainës u diskutua gjithashtu. Marrëveshja që ka mbështetjen e Parlamentit, duhet të nënshkruhej në nëntorin e kaluar, por qeveria ukrainase e tërhoqi atë në momentin e fundit, duke shkaktuar protesta të mëdha. Kowal tha se, Marrëveshja tashmë është gati për t’u nënshkruar dhe kjo do të ndodhë pas zgjedhjeve presidenciale të majit në Ukrainë.