Email në adresën
Mediat kanë cituar aktoren Angeline Jolie të ketë thënë se dhuna është krimi i madh. Dhe nga mënyra si është servirur citimi i saj, të duket sikur seks simbol i Kinemasë ka bërë zbulimin e shekullit. Që dhuna është krim nuk është e nevojshme ta thotë Jolie; as faktin nëse është krim i madh apo i vogël. E keqja ka rrënjë dhe zbulimi më i madh është të shkosh tek rrënjët, tek ato që sjellin më pas dhunën, e krimin padyshim. Në rastin e Bosnjës, por dhe luftërave të tjera të ngjashme me to, rrënjët e kanë emrin nacionalizëm. Një nacionalizëm i bazuar në gënjeshtrat e zbukuruara prej popujve, që nuk kanë gjetur një mënyrë të jetuari me të vërtetën; prej popujve që e kanë shndërruar në mënyrë jetese, gati-gati në identitet që të ekzistojnë të dashuruar me gënjeshtrën, një lloj ushqimi që ua kanë servirur ca koka të nxehta e pa të cilin ato nuk frymojnë dot. Këto gënjeshtra quhen ndryshe dhe mite, që Ballkani i ka me shumicë. I kemi dhe ne, pa dyshim. Dhe në emër të tyre, ndodh çdo ditë të qëllohen njerëz, ndonëse jo me armë. Kur gjermanët nisën të ushqehen me mitin se janë ata raca më e përkryer në botë, bën atë që bën nën shenjën e nazizmit. Ishte një gënjeshtër që i kushtoi botës jo pak. Dhe kur nisën të jetojnë me realitetin e gjërave, të vërtetën e tyre, duke garuar me vlerën e punës e virtytit, çmuan veten, jo me formulën e gjakut, por me atë të djersës dhe kreativitetit.