Darka Rama-Topi: S’u fol për poste, por fryma e mirëkuptimit e nënkupton

Kryeministri Edi Rama ka darkuar mbrëmjen e sotme me kreun e Partisë Fryma e Re Demokratike, Bamir Topi, ish-President i vendit. Topi shoqërohej në këtë takim nga ish-deputeti demokrat Sali Shehu dhe nënkryetari Daut Gumeni,  ndërsa Rama kishte në krah zv.kryeministrin Niko Peleshi. Darka mes tyre është konsumuar në një prej lokaleve kryesore të Tiranës, ndërsa nuk ka të dhëna për natyrën e takimit dhe për çështjet e diskutuara. Kryetari i FRD Bamir Topi, ish-president i vendit dha një prononcim të shkurtër për mediat pas darkës duke thënë se nuk ka shumë për të deklaruar pasi, siç tha ai,  “është dikush që e ka shumë qejf  Facebook-un dhe me siguri do flasë për aktin e fundit të grushtit të shtetit”. Topi tha se ishte ftuar nga kryeministri Rama në këtë darkë dhe e cilësoi takimin normal kur bëhet fjalë për interesat e vendit dhe për vendime të rëndësishme si ndryshimet kushtetuese dhe reforma administrative.

Çfarë u bisedua

Zyrtarisht nuk ka deklarta për natyrën e takimit dhe për çështjet e diskutuara, por një nga pjesëmarrësit tha mbrëmë për ‘DITA ’ se FRD do të jetë në krah të maxhorancës aktuale dhe qeverisë Rama në të gjitha çështjet që kanë të bëjnë me interesat kombëtare dhe proceset integruese. Gjatë darkës janë trajtuar çështje të rëndësishme të aktualitetit dhe zoti Topi ka shprehur mbështetjen e forcës së tij politike për qëndrimet e Ramës dhe për  vizionin e tij politik – tha burimi i Ditës. I pyetur nëse është folur konkretisht për poste ai tha se “nuk është folur gjatë darkës për dhënie postesh për FRD-në, por kjo është lënë të nënkuptohet nga fryma e mirëkuptimit midis palëve”.

Më herët Rama ka firmosur një përfaqësues të FRD-së në drejtimin e Institutit të ish-të Përndjekurve Politikë.