Kthimi i Ishulli të Sazanit në një destinacion turistik, Tare e nis punën me ngritjen e flamurit

Agjencia Kombëtare e Bregdetit po punon që të kthejë ishullin e Sazanit në një destinacion të rëndësishëm të turizmit në vendin tonë.

Drejtori i saj, Auron Tare e ka nisur punën në këtë ishull me ngritjen e flamurit. Sikurse bën të ditur Tare, nga dita e sotme Agjencia Kombëtare e Bregdetit do të jetë në Sazan për të udhëhequr një projekt ambicioz në kthimin e ishullit të braktisur në një zonë të rëndësishme të turizmit rajonal.

Për këtë, ai falenderon për bashkëpunimin e ngushtë “Conservatuar de Littoral”, agjencia partnere franceze në këtë projekt.

Sazani është një nga zonat më magjike të Shqipërisë, me një histori të lashtë që zë fill  nga shekulli i VI p.e.s. me emrin SASON. Gjatë mesjetës, ishulli kaloi në zotërimin Venecian. Në kohërat e reja së bashku me ishujt jonianë të Greqisë u pushtua nga Anglia. Që nga koha e Jul Çezarit e deri në Luftën e Dytë Botërore në bregdetin përreth Gjirit të Vlorës janë zhvilluar një numër betejash detare, pasojë e të cilave kanë qenë disa anije të mbytura.

Një pjesë relikesh nënujore si, amfora e objekte të tjera, janë rikuperuar nga arkeologët shqiptarë dhe janë ekspozuar në Muzeun Historik  dhe atë arkeologjik në Durrës.

Sazani është një perlë turistike e pa shfrytëzuar deri më sot. Ishulli ka një gjeografi të përsosur për të zhvilluar turizmin detar, atë të aventurës, të historisë dhe të peshkimit.

Në bashkëpunim me specialistët e Agjencisë Franceze të Bregdetit “Konservatori Littoral” specialistë nga AKB, po qëndrojnë në Ishullin e Sazanit për të vënë në jetë  planin e veprimit të fillimit të projektit “ Sazani”. Ky projekt synon ta kthejë ishullin e Sazanit në një atraksion turistik të klasit të parë duke respektuar në mënyrë korrekte  ekosistemin dhe historinë e ishullit.