Kufoma e Lushnjës pa kokë, policia kërkon ndihmë për identifikimin

Një kufomë mashkulli që u gjet në autostradën Lushnjë-Fier në fundjavë, rezulton të jetë pa kokë dhe gjymtyrë sipas ekspertëve mjeko-ligjorë. Në trup u konstatuan shenja të rrotave të makinës që flasin për një aksident, por rrethanat e këputjes së gjymtyrëve mbeten ende të pashpjegueshme. Për këtë arsye, Mjekësia Ligjore u bëri apel familjarëve që kanë njerëz të humbur, që të interesohen për identifikimin e saj. Mësohet nga burime policore se përveç kokës, trupit i mungojnë edhe gjymtyrë të tjera si këmba e majtë dhe një dorë. Kjo ka vështirësuar identifikimin e personit të gjetur në Savër ditën e 28 marsit. Nga këqyrja rezulton se është i seksit mashkull, nuk dihet mosha e saktë, por është i gjatë 170 cm. Në trup ka pasur të veshur dy xhupa, tre palë pantallona dhe disa bluza të shkurtra, ndërsa në xhep i është gjetur një lugë alumini dhe një brisk. Policia dyshon paraprakisht se bëhet fjalë për ndonjë endacak apo të sëmurë. Kurse trupi ka qenë pjesërisht edhe i dekompozuar, ndaj ekspertët mendojnë se aksidenti mund të ketë ndodhur të paktën dy muaj më parë. Këputja e gjymtyrëve mund të ketë ardhur edhe për shkak të dëmtimit nga kafshët e egra. Kufoma u dërgua në Morgun e Tiranës edhe për të kryer ADN.